महागढीमाइका नगर प्रमुखले थुने आफ्नै घरको लाइन काट्न आएका विद्युतका कर्मचारी

२९ पुष, बारा । बाराको महागढीमाई नगरपालिकाका नगर प्रमुख उपेन्द्रप्रसाद यादवले आफ्नो घरमा लाइन काट्न आएका नेपाल विद्युत प्राधिकरणका कर्मचारीलाई नगर प्रहरी लगाएर थुनाएका छन् । उनले लामो समयदेखि विद्युतको महसुल नबुझाएपछि प्राधिकरणको टोली उनको घरमा लाइन काट्न पुगेको थियो । प्राधिकरणको टोली घरमा लाइन काट्न आएपछि उनीहरूसँग केहीबेर विवाद भएको थियो ।

त्यसपछि नगर प्रमुख यादवले नगर प्रहरीलाई घरमा बोलाएका थिए । उनले नगरका प्रहरीलाई प्राधिकरणका कर्मचारीलाई पक्रन लगाएर थुनेर राखेका छन् । यस विषयमा नगर प्रमुख यादवको फोनमा सम्पर्क हुन सकेन भने नगरका सूचनाप्रविधि अधिकृत कृष्ण सर्राफले यो विषयमा आफूलाई जानकारी नभएको बताए । विद्युत प्राधिकरणले भने नगर प्रमुखले लाइन काट्न गएका कर्मचारीलाई नगर प्रहरी लगाएर नियन्त्रणमा राखेको जनाएको छ ।