दल फुुटाउन र मिलाउन प्रधानमन्त्री भएको होइनः ओली

२९ पुष, काठमाडौं । प्रधानमन्त्री केपी शर्मा ओलीले आफू दल फुटाउन र मिलाउनका लागि प्रधानमन्त्री नभएको बताएका छन् । उनले राजनीतिक दलसम्बन्धी कानुनलाई सच्याउनुपर्ने आवश्यकता भएको भन्दै कुनै दललाई फुटाउने र मिलाउने काम प्रधानमन्त्रीको नभएको बताएका छन् । दल विभाजन गराउनेसम्बन्धी अध्यादेश ल्याउन लागेको भनेर नकारात्मकता फैलाइएको उनको भनाइ छ । 

नेपाल पत्रकार महासंघका नवनिर्वाचित पदाधिकारीलाई सोमबार बालुवाटारमा बधाई तथा शुुभकामना दिने क्रममा उनले कुनै पनि दल मिल्ने र फुट्ने सबैको आन्तरिक विषय भएको बताए । अर्काको दल फुटाउने काम कुकर्म भएको र यास्तो मनसाय आफूमा नरहेको उनको भनाइ थियो । उनले विगतमा आफू प्रधानमन्त्री हुँदा संसदीय दल वा केन्द्रीय कमिटीमा ४० प्रतिशतको व्यवस्था गरेर अध्यादेश ल्याएको र विरोध भएपछि फिर्ता लिएको बताए । 

तिनै विरोध गर्नेले २० प्रतिशत सांसदले विभाजन गर्न पाउने भन्ने व्यवस्था गरेर दल फुटाएको उनको भनाइ छ । प्रधानमन्त्री ओलीले देश विकास र जनताका सेवालाई ध्यानमा राखेर सरकारले राष्ट्रपतिसमक्ष विभिन्न अध्यादेश सिफारिस गरेको उल्लेख गरे । नेपाली कांग्रेसका सभापति शेरबहादुर देउवाबाट त्यसको विरोध भयो भन्ने झुटो वक्तव्य प्रचार गरिएका जस्ता घटनाबाट नेपाली पत्रकारिता जोगिनुपर्नेमा उनले जोड दिए ।

यस्ता सूचना र समाचारका कारण जनताको सूचनाको हकको घाँटी निमोठिने भएकाले लोकतन्त्रको दुरुपयोग हुन नदिन पत्रकार महासंघले पनि भूमिका निर्वाह गर्नुपर्ने उनले बताए । देश र जनताका पक्षमा आफूहरूले दिन र रात नभनी काम गरिरहेको उनले बताए । हामी १०–५ को जागिर खान आएका होइनौँ । देश र जनताप्रतिको जिम्मेवारी बोध गरेर दिउँसो वा राति काम हुन्छ । लुकाएर र छलछाम गरेर काम गर्ने मेरो बानी छैन । देशका हितमा खुलेआम काम गर्ने हो, उनले भने ।