बुधबार २ अंकले बढेर २५९५ मा रोकियो नेप्से, ५ अर्ब ८२ करोडका शेयर किनबेच भए

२ माघ, काठमाडौं । बुधबार शेयरबजारमा झिनो अंकको सुधार देखिएको छ । आज नेप्से परिसूचक १.८३ अंकले बढेर २५९५.९६ बिन्दुमा रोकिएको छ । आज २९९ कम्पनीको १ करोड ७ लाख ४५ हजार ४ सय २७ कित्ता शेयर ६३ हजार ३७७ पटक खरिदबिक्री भए । ५ अर्ब ८२ करोड ४९ लाख ४ हजार १३४ को कारोबार भयो । सोमबार ६ अर्ब ६५ करोडको कारोबार भएको थियो ।

अघिल्लो कारोबार दिन सोमबार १५.५४ अंकले घटेर २५९४.१३ अंकमा बन्द भएको नेप्से आज २५९५.९६ अंक पुगेको हो । विकास बैंक, होटल र जलविद्युत् क्षेत्रका उपसूचक बढे भने बैंक, फाइनान्स लगायत क्षेत्र घटेपछि समग्रमा नेप्से सिमान्त रूपमा मात्रै सकारात्मक बनेको हो ।

कारोबारका हिसाबले सबैभन्दा धेरै एनआरएन इन्फ्रास्ट्रक्चर एन्ड डेभलपमेन्टको साढे ३२ करोडको कारोबार भयो भने सुपर मादी हाइड्रोको करिब ३१ करोडको कारोबार भएको छ । बुधबार कुल २ सय ९९ कम्पनीको १ करोड ७ लाख कित्ता शेयर किनबेच भएको छ ।

आज सबैभन्दा धेरै जलविद्युत् उपसमूह १.७६ प्रतिशतले बढेको छ भने होटल तथा पर्यटन क्षेत्र १.६३ प्रतिशतले वृद्धि भएको छ । त्यस्तै घट्नेमा भने फाइनान्स उपसूचक अगाडि देखिएको छ । फाइनान्स कम्पानीका सेयर औसतमा साढे ३ प्रतिशतले घटेका छन् ।

बुधबार दोल्ती पावर र सुपर मादी जलविद्युत् कम्पनीको सेयर सकारात्मक सर्किटको स्तरमा कारोबार भए । त्यस्तै, न्यादी जलविद्युत्को सेयर भने १० प्रतिशतको नकारात्मक सर्किटमा कारोबार भयो । पोखरा फाइनान्स, जानकी फाइनान्स, नेपाल फाइनान्स लगायत कम्पनीको सेयरमा पनि उच्च गिरावट आएको छ ।