राजपत्रमा प्रकाशित भए राष्ट्रपतिले जारी गरेका भूमि बाहेकका चारवटा अध्यादेश (पूर्णपाठसहित)

३ माघ, काठमाडौं । बिहीबार चार अध्यादेश राजपत्रमा प्रकाशित भएका छन् । ती अध्यादेश सरकारको सिफारिसमा राष्ट्रपति रामचन्द्र पौडेलले जारी गरेका थिए । राष्ट्रपति पौडेलले आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, सुशासन प्रवद्र्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने अध्यादेश, निजीकरण (पहिलो संशोधन) अध्यादेश, आर्थिक तथा व्यावसायिक वातावरण सुधार र लगानी अभिवृद्धिसम्बन्धी केही नेपाल ऐनलाई संशोधन गर्न बनेको अध्यादेश सोमबार जारी गरेका थिए । 
 
बुधबार भूमिसम्बन्धी अध्यादेश पनि राष्ट्रपतिले जारी गरेका छन् । यो अध्यादेशमा केही संवेदनशील विषय भएको भन्दै उनले तीन दिनसम्म रोकेका थिए । गत पुस २६ गते बसेको मन्त्रिपरिषद् बैठकले २९ वटा कानुन संशोधन गर्न पाँचवटा अध्यादेश जारी गर्न राष्ट्रपतिसमक्ष सिफारिस गरेको थियो ।

भूमिसम्बन्धी अध्यादेशमा सरकारी र सार्वजनिक जग्गामा बसेका देशभरका भूमिहीन जनतालाई कुनै स्थानको जग्गा लालपूर्जासहित उपलब्ध गराउने व्यवस्था समेटिएको छ ।  त्यसरी वितरण गर्न खोजिएको जग्गा वन क्षेत्रमा पनि पर्ने भएकाले वन ऐन पनि संशोधन प्रस्ताव गरिएको छ । सुकुमवासीसँग सम्बन्धित विषयमा ठूलो राजनीति जोडिएको सरकारी जग्गा बाँड्ने विषय यो अध्यादेशमा परेपछि राष्ट्रपतिले त्यसलाई जारी नगरी राखेका थिए । तर, बुधबार जारी गरे ।