सुप्रिम सहकारी ठगीमा रविसहित १४ जनाविरुद्ध रुपन्देही जिल्ला अदालतमा आज मुद्दा दर्ता हुने

३ माघ, बुटवल । पोखरा र काठमाडौं जिल्ला अदालतबाट फैसला आइसकेपछि बिहीबार रुपन्देहीमा पनि राष्ट्रिय स्वतन्त्र पार्टीका संस्थापक सभापति रवि लामिछानेसहित १४ जना विरुद्ध मुद्दा दर्ता हुने भएको छ । १४ जनाविरुद्ध १ अर्ब १२ करोड बिगो दाबीसहित रूपन्देही जिल्ला अदालतमा बिहीबार नै मुद्दा दर्ताको तयारी गरेको जानकारी दिइएको छ । 

यसअघि २८ जनालाई प्रतिवादी बनाएर मुद्दा दर्ता भएको थियो । जिल्ला सरकारी वकिल कार्यालयका अनुसार सहकारी ठगी, संगठित अपराध र सम्पत्ति शुद्धीकरणमा मुद्दा दर्ता गर्न लागिएको हो । रवि लामिछानेलाई ४ करोड १३ लाख र छविलाल जोशीलाई ४ करोड २८ लाख रुपैयाँसहित ४२ जनाविरुद्ध १ अर्ब १२ करोड बिगो माग गरिएको छ । यसअघि प्रहरीले सुप्रिम सहकारीकै रकम अपचलन गरेको अभियोगमा गितेन्द्रबाबु राईसहितका २८ जनाविरुद्ध मुद्दा दर्ता गरिसकेको छ ।

प्रहरीले गत शुक्रबार नै ४ सय पेज बढीका दुई प्रतिवेदन सरकारी वकिलको कार्यालयई बुझाएको थियो । जिल्ला सरकारी वकिल कार्यालयका न्यायाधिवक्ता प्रेमराज पौडेलले मुद्दा दर्ताका लागि कागज रुजु गर्ने काम भइरहेको र केही बेरमा मुद्दा दर्ता हुने बताए । बुटवलस्थित सुप्रिम सहकारी ऋण तथा बचत सहकारी संस्थाका १० हजार ३ सय ९१ जना बचतकर्ताको १ अर्ब १२ करोड भन्दा बढी रकम अपचलन भएको छ ।