बेलायतमा कोइरालाले उठाए गोर्खा सैनिकदेखि ब्रिटिस एअरवेजको नेपालमा सिधा उडानसम्मका विषय

३ माघ, काठमाडौं । नेपाली कांग्रेसका वरिष्ठ नेता डा. शेखर कोइरालाले बेलायत भ्रमणका क्रममा विभिन्न विषयहरू उठान गरेका छन् । उनले बेलायती अधिकारीसँग जलवायु परिवर्तनका असरदेखि ब्रिटिस एयरवेजलाई नेपालमा सिघा उडान गराउनुपर्ने सम्मका प्रस्ताव गरेका छन् । गोर्खा सैनिकका समस्याका विषयलाई पनि उनले बेलायती अधिकारीसमक्ष राखेका छन् । 

कोइरालाका स्वकीय सचिव दिनेश थपलियाका अनुसार बेलायतमा उनले बेलायतका विभिन्न नेता र उच्च अधिकारीसँग भेटवार्ता गरेका छन् । यसक्रममा बेलायती संसदको नेपाल हेर्ने सर्वदलीय संसदीय समितिका अध्यक्ष अलेक्स बेकरसँगको भेटघाटमा उनले जलवायु परिवर्तनले नेपालमा पारिरहेको असरका विषयमा कुराकानी गरेका छन् । 

नेता कोइरालाले जलवायु परिवर्तनले नेपालमा हिमश्रृंखलाहरु नांगो हुँदै गएको र पानीका मुहानहरु सुक्नुका साथै बालीनाली र पशुपालनमा समेत प्रत्यक्ष असर देखिएको कोइरालाले उल्लेख गरेका छन् । जलवायु परिवर्तनका कारण नेपाल संकटमा छ । हिउँ पग्लेर हिमालहरु कुरुप बनिरहेका छन्, अध्यक्ष केशरसँगको भेटमा कोइरालाले भने, ‘जलवायु परिवर्तनका कारण नेपालले जुन क्षति व्यहोरिरहेको छ त्यसका लागि नेपालले क्षतिपूर्ति पाउनुपर्छ ।’

यस्तै कोइरालाले ब्रिटिस एअरवेजको लण्डन–काठमाडौं सिधा हवाई उडानको वातावरण मिलाउन बेकरसँग आग्रह गरेका छन् । नेपाल पर्यटकका लागि आकर्षक गन्तव्य भएको उल्लेख गर्दै कोइरालाले ब्रिटिस एअरवेजको लण्डन–काठमाडौं सिधा हवाई उडान हुन सकेमा बेलायतबाट नेपाल जाने पर्यटकका लागि सहज हुनेछ बताए । 

कोइरालाले भूतपूर्व गोर्खा सैनिकहरुको सेवा सुविधा समस्याको समाधानका लागि पनि बेलायत सरकार गम्भीर हुनुपर्ने विषयमा जोड दिएका छन् । भेटका क्रममा बेकरले आफ्नो तर्फबाट सक्दो सहयोग गर्ने प्रतिबद्धता व्यक्त जनाएकी छन् । यस्तो कोइरालाले हाउस अफ कमन्समा कन्जरभेटिभ पार्टीका नेता एवं बेलायतका पूर्वविदेशमन्त्री जेम्स क्लेभर्लीसँग भेटघाट गरी दुई देशमा सहयोग आदानप्रदान प्रस्ताव गरेका छन् । 

भेटमा नेताद्वयबीच नेपाल–बेलायत सम्बन्ध र आपसी सहयोग जस्ता विषयमा कुराकानी भएको थियो । कोइरालाले नेपालमा बेलायती सहयोगमार्फत बनेका आयोजनामा थप सहयोगका निम्ति पहल गरिदिन आग्रह गरेका थिए । उनी बेलायतका एशिया मामिला हेर्ने विदेश राज्यमन्त्री क्याथराइन वेष्ट र उद्योग, व्यापार तथा वाणिज्य मन्त्री ग्यारेथ थोमसको निमन्त्रणामा बेलायत गएका हुन् ।