बिहीबार ७ अंकले घट्यो बजार, नेप्से २५८८ मा बन्द हुँदा ५ अर्ब ९३ करोडमाथि भयो कारोबार

 ३ माघ, काठमाडौं । शेयरबजारमा गिरावट आएको छ । बजार मापन गर्ने सूचक ७.३३ अंकले घटेर परिसूचक २५८८.६२ बिन्दु कायम भएको छ । बिहीबार २९६ कम्पनीको १ करोड १७ लाख ४९ हजार ७०१ कित्ता शेयर ५ अर्ब ९३ करोड ३७ लाख ११ हजार ६७४ मा किनबेच भएको छ ।
 
बिहीबार पनि फाइनान्स उपसूचकमा ठूलो गिरावट आएको छ । यसका साथै बैंक, विकास बैंक, होटल तथा पर्यटन, लगानी, माइक्रोफाइनान्स, जीवन तथा निर्जीवन बीमा लगायत क्षेत्रको शेयर घटेको छ । साताको अन्तिम कारोबार दिन जलविद्युत् ३, प्रशोधन उद्योग, म्युचुअल फन्ड र व्यापार उपसूचक मात्रै सीमान्त रूपमा बढेका छन् ।

कारोबारमा ८९ कम्पनीको शेयर मूल्य बढेको छ भने १५१ कम्पनीको शेयर मूल्य घटेको छ । कारोबारमा बोटलर्स नेपाल बालाजु, वन नेपाल लघुवित्त, मन्दाकिनी हाइड्रोपावर, अप्पर हेवाखोला हाइड्रोपावर कम्पनीको सेयर मूल्यमा सकारात्मक सर्किट लागेको छ । यस्तै पोखरा फाइनान्स कम्पनीको शेयर मूल्यमा नकारात्मक सर्किट लागेको छ ।
 
कारोबार रकमका हिसाबले भने सिन्धु विकास बैंकको शेयर सबैभन्दा बढी कारोबार भएको छ भने यसलाई एनआरएन र सानिमा मिडल तमोरले पछ्याएका छन् । सिन्धु विकास बैंकेको २८ करोड ५७ लाख २९ हजार ४४१ रुपैयाँको शेयर कारोबार भएको छ । दोस्रो र तेस्रो स्थानमा क्रमशः एनआरएन इन्फ्रास्टक्चर एण्ड डेभलपमेन्ट कम्पनी र सानिमा मिडल तमोर कम्पनी रहेका छन् ।