अवैध सुन भित्र्याएकाे आरोपमा घलेबिरुद्ध साढे १७ करोडको मुद्दा, ३ बर्ष कैद

काठमाडौं। राजश्व अनुसन्धान विभागले सुनमा विदेशी मुद्रा अपचलन गरेको आरोपमा शेर ग्याल्वो घलेबिरुद्ध अदालतमा मुद्दा हालेको छ।

विभागले चोरी पैठारी गरी घलेले सात केजी सुन ल्याएर राजश्व चुहावट गरेको आरोपमा रसुवा जिल्ला अदालतमा मुद्दा हालेको हो। यसको विगो सात करोड ११ लाख ७६ हजार रुपैयाँ कायम गरिएको छ।

रसुवागढीबाट स्याफ्रुतर्फ आउदैगरेको ना६ख ९०६८ नम्वरको कन्टेनर डिब्बामा विना विल विजक लुकाएर राखेको अवस्थामा ७ केजी सुन बरामद भएको थियो। प्रहरीले बरामद गरेको सुन घलेले आयात प्रज्ञापनपत्र तथा भन्सार तिरेको रसिद निस्सा दाखिला गर्न नसकेको आरोप लगाइएको छ।

सुन ३ करोड ५५ लाख ८८ हजार रुपैयाँ बराबरको छ। उनले त्यो सुन चिनबाट खरिद गर्न सोही रकम बराबरको विदेशी विनिमय गैरकानुनी तबरबाट अपचलन गरेको पुष्टि भएको विभागको ठहर छ।

विभागले उनलाई तीन बर्ष कैद हुने दावी पनि प्रस्तुत गरेकोछ । विगो र जरिवानासहित गरि उनलाई १७ करोड ७९ लाख ४० हजार भराउनु पर्ने माग पनि विभागको छ।