नेपाली राष्ट्रिय क्रिकेट टोलीकाे मुख्य प्रशिक्षकमा भारतका पटवाल

काठमाडौं । नेपाली राष्ट्रिय क्रिकेट टोलीको मुख्य प्रशिक्षकको जिम्मेवारी उमेश पटवालले पाउने भएका छन् । पटवाल भारतीय नागरिक हुन् ।

पछिल्लो समय नेपाली राष्ट्रिय टोलीमा ब्याटिङ कन्सल्ट्यान्टका रुपमा काम गर्दै आएका पटवाललाई अन्तर्राष्ट्रिय क्रिकेट परिषद् (आईसीसी) ले नेपाली टोलीको मुख्य प्रशिक्षकमा नियुक्त गर्ने तयारी गरेको हो ।

राष्ट्रिय खेलकुद परिषद् (राखेप) स्रोतका अनुसार उनलाई आईसीसीले एक वर्षका लागि प्रशिक्षक नियुक्त गर्न लागेको हो । यसअघि राष्ट्रिय टोलीको मुख्य प्रशिक्षकमा जगत टमटा रहेका थिए । पटवाल नेपाली क्रिकेट टोलीको पछिल्लो सफलताको सारथी पनि हुन् ।

उनी सन् २०१८ मा नेपालले जिम्बाबेमा भएको विश्वकप छनोट खेरिहँदा पनि टोलीमा रहेका थिए ।

नेपालले एकदिवसीय मान्यता पाएसँगै नेपाली टोलीलाई विदेशी प्रशिक्षक आवश्यक रहेको चर्चाकाबीच आईसीसीले पटवाललाई नेपाली टोलीको जिम्मा दिएको हो । उनको नियुक्तिदेखि तलबसम्म आईसीसीले व्यहोर्ने स्रोतले जनाएको छ ।

पटवालले यसअघि अफगानिस्तान राष्ट्रिय क्रिकेट टोलीको पनि नेतृत्व गरीसकेका छन् ।