प्रधानमन्त्री कप क्रिकेट : आज दुई खेलमा ४ टोली भिड्दै !

काठमाडौं। प्रधानमन्त्री कप एकदिवसीय क्रिकेट प्रतियोगितामा सोमबार आज दुई खेल हुँदैछन् । कीर्तिपुरस्थित त्रिभुवन विश्वविद्यालयको क्रिकेट मैदानमा गण्डकी प्रदेश र पाँच नम्बर प्रदेश भिड्दैछन् ।

तीन खेलबाट तीन अंक जोडेको पाँच नम्बर प्रदेशको सेमिफाइनल प्रवेशको सम्भावना कायमै छ । गण्डकी प्रदेश भने एक अंकसहित अंकतालिकाको पाँचौं तथा अन्तिम स्थानमा छ ।

सोमबार नै ९ बजेपछि मुलपानी क्रिकेट मैदानमा हुने खेलमा सुदूरपश्चिम र प्रदेश तीन भिड्दैछन् । चार अंकसहित तालिकाको दोस्रो स्थानमा रहेको प्रदेश तीन खेल जित्दै सेमिफाइनलमा स्थान सुरक्षित गर्ने दाउमा छ ।

एक अंकसहित तालिकाको तेस्रो स्थानमा रहेको सुदूरपश्चिम प्रदेशले खेलेका दुईमध्ये एक खेल बराबरी गर्दै एक अंक मात्रै जोडेको छ ।

समूह ए बाट ३ खेल जितेको सशस्त्र प्रहरीको एपीएफ क्लबले सेमिफाइनलमा स्थान सुरक्षित गरिसकेको छ । समूह बी बाट भने दुई विभागीय टिम नेपाल पुलिस र त्रिभुवन आर्मी क्लब अन्तिम चारमा पुगिसकेका छन् ।