प्रधानमन्त्री कप क्रिकेट : प्रदेश पाँच विजयी

काठमाडौं । प्रधानमन्त्री कप एक दिवसीय क्रिकेट प्रतियोगिताको अन्तिम खेलमा प्रदेश पाँच विजयी भएको छ ।सोमबार गण्डकी प्रदेशलाई ३ विकेटले पराजित गर्दै तालिकामा ५ अंक जोडेको थियो । तर यस समूहबाट ६ अंक जोडेका प्रदेश तीन र एपीएफ विजेता र उपविजेता बन्दै सेमिफाइनलमा पुग्न सफल भए ।

कीर्तिपुर खेल मैदानमा गण्डकी प्रदेशले दिएको २३५ रनको लक्ष्य प्रदेश पाँचले ४९.५ ओभरमा पुरा गरेको थियो । प्रदेश पाँचलाई जिताउन सौरभ खनालले ९० रन जोडे । उनले ११२ बल फेस गरेका सौरभले १२ चौका प्रहार गरेका थिए । प्रणित थापा मगरले ४५ रन जोडे ।

निश्चल चौधरीले ३३ रन जोडेका थिए । टस जितेर पहिला ब्याटिङ गर्दा अनिल गुरुङको शतकको मद्दतले गण्डकी प्रदेशले २३४ रन बनाएको थियो । ओपनिङ आएका अनिलले ११५ रन बनाए ।

१४१ बलमा ४ चौका र १ छक्काको मद्दतले शतक पुरा गरेका अनिलले समग्रमा ११५ रन बनाएर आउट भएका हुन् । उनले १५२ बल फेस गर्दा ५ चौका र १ छक्का प्रहार गरे । ओपनिङ आएका अनिल नवौं विकेटको रुपमा आउट भएका थिए । प्रदेश पाँचका अनिल खरेलले ५ विकेट लिँदा विक्रम भुषालको नाममा २ विकेट रह्यो ।

यस्तै मुलपानी मैदानमा भएको खेलमा सुदूरपश्चिम प्रदेशलाई ६ विकेटले हराउँदै प्रदेश ३ ले अन्तिम चारको यात्रा तय गरेको छ । प्रदेश ३ ले चार खेलबाट ६ अंक बनाएको छ । रनरेटमा अघि रहँदै प्रदेश ३ समूह एको विजेताका रुपमा सेमिफाइनलमा पुगेको छ ।

राष्ट्रिय टिमका कप्तान पारस खड्काको नेतृत्वमा रहेको प्रदेश ३ ले सुदूरपश्चिमले दिएको १५५ रनको सामान्य लक्ष्य ३३.२ ओभरमा चार विकेट गुमाउँदै पूरा ग¥यो । यसअघि टस जितेर ब्याटिङ गर्ने निर्णय गरेको सुदूरपश्चिमले ४५.१ ओभरमा अलआउट हुँदा १५४ रन बनाएको थियो ।