विश्वकप क्रिकेट : उपाधिको दाबेदार दक्षिण अफ्रिका र भारत खेल्दै

साउथ ह्याम्पटन । विश्वकप क्रिकेटमा बुधबार (आज) भारत र दक्षिण अफ्रिका खेल्दैछन । खेल इंग्ल्याण्डको साउथह्याम्पटनमा नेपाली समयअनुसार दिउँसो सवा ३ बजेपछि शुरु हुनेछ ।

दक्षिण अफ्रिकाले यसअघि लगातार दुई खेल हारेको छ भने उपाधि दाबेदार मानिएको भारत आज पहिलो खेल खेल्दैछ । दुई खेल हारेर कमजोर मानिएको दक्षिण अफ्रिकामाथि आज भारत हावी हुने अपेच्छा छ ।

उसका मुख्य हतियार मानिएका डेल स्टेन र लुंगी नेग्डी चोटका कारण बाहिरिएपछि दक्षिण अफ्रिकाको बलिङमा अर्को चुनौति थपिएको छ । व्याटिङतर्फ हसिम अमला, फाफ डुप्लेसिस, क्वीन्टन डीकक लगायतका स्टार व्याट्सम्यानले एकनासको प्रदर्शन गर्न सकेका छैनन ।

भारत बलिङ र व्याटिङ दुबैतर्फ उत्कृष्ट मानिएको टोली हो । अहिलेका सर्वाधिक सफल र उत्कृष्ट व्याट्सम्यान विराट कोहलीको कप्तानीमा रहेको भारतलाई विश्वकप जितिसकेको अनुभव बटुलेका महेन्द्रसिंह धोनीको साथ छ ।व्याटिङमा कोहली, धोनीका साथै रोहित शर्मा, शिखर धवन र लोकेश राहुल पनि उत्तिकै फर्ममा छन ।

बलिङतर्फ जस्प्रित बुम्राह, भुवनेश्वर कुमार, मोहम्मद शामीले जतिबेला पनि खेल आफ्नो पक्षमा पार्न सक्छन । स्पिनतर्फ युज्वेन्द्र चाहल, कुलदिप यादव र केदार जादव भारतका मुख्य हतियार हुन । उसो त टिममा रवीन्द्र जडेजा र हार्दिक पाण्डयाजस्ता अलराउण्डर पनि छन ।

यसपटकको उपाधि दाबेदारमा इंग्ल्याण्ड, अष्ट्रेलिया र भारत मानिएका छन । व्याटिङ, बलिङ र रणनीतिका हिसाबले अरुभन्दा भारतलाई मुख्य दाबेदार मानिएको छ । सन् २०१५ को विश्वकपमा भारत सेमीफाइनलमा अष्ट्रेलियासँग हारेपछि घर फर्किएको थियो । दक्षिण अफ्रिका भने न्युजिल्याण्डसँग पराजित भएर फाइनल पुग्नबाट बञ्चित भएको थियो ।