छत्रेश्वरी गाउँपालिकाको वडा कार्यालयमा अज्ञात समुहद्वारा आगजनी

सल्यान । सल्यानको छत्रेश्वरी गाउँपालिकाको वडा कार्यालयमा गएराती अज्ञात समुहले आगजनी गरेको छ । सोही गाउँपालिकाको ३ नम्बर वडा कार्यालयमा सोमबार राति करिब २ बजे आगलागी भएको जिल्ला प्रहरी कार्यालय सल्यानले जनाएको छ ।

राति आगलागी भएको थाहा पाएपछि स्थानीयले प्रहरीलाई खबर गरेका थिए। आगलागीबाट कार्यालयमा रहेका सम्पूर्ण कागजात, २ वटा ल्यापटप, १ सेट डेस्कटप कम्युटर, प्रिन्टर, सोलार प्यानल, दराज, कुर्सीलगायतका सामग्रीहरु जलेर नष्ट भएको जिल्ला प्रहरी कार्यालय सल्यानका डिएसपी गेहेन्द्रबहादुर शाहीले नेपाल बहसलाई जानकारी दिए ।

आगलागी कसले र के कारणले भएको हो भन्ने बारे अनुसन्धान भइरहेको शाहीले जानकारी दिए । घटनाबारे अनुसन्धान भइरहेको प्रहरीको भनाइ छ। गएराती २ बजेदेखि आगो लागेको भएपनि प्रहरीले भने ३ बजेमात्र थाहा पाएको थियो । वडा कार्यालयमा दुई वटा कोठा रहेको र त्यस मध्ये एउटा कोठामा रहेको सामान जलेर नष्ट भएको छ । प्रहरी र स्थानीय बासिन्दाको सहयोगमा मंगलबार बिहान मात्रै आगो नियन्त्रणमा आएको थियो ।