सहकारी संस्थामार्फत ठगी गर्ने श्रेष्ठ कुपण्डोलबाट पक्राउ

ललितपुर। सहकारी संस्था संचालन गरी रकम ठगी गर्ने काठमाडौं महानगरपालिका–७ बस्ने ४२ वर्षीय रोशन श्रेष्ठलाई कुपण्डोल, ललितपुरबाट बुधबार प्रहरीले पक्राउ गरेको छ ।

ठगी मुद्दामा उच्च अदालत पाटनको २०७३ जेठ २५ गतेको फैसलाले ८ लाख ४६ हजार २ सय ५० रुपैयाँ जरिवाना र २ बर्ष कैद हुने ठहर भई फरार रहेका प्रतिवादीलाई केन्द्रीय अनुसन्धान ब्यूरोको टोलीले पक्राउ गरेको हो । रोशनसहितका संचालकले काठमाडौं महानगरपालिका–७ चाबहिलस्थित शाइन बचत तथा ऋण सहकारी संस्था लिमिटेडमार्फत सर्वसाधारण बचतकर्ताहरुलाई जम्मा गरेको रकमको बढी ब्याज दिने भनी झुठ्ठा प्रलोभनमा पारी ३३ लाख ८५ हजार ५ सय रुपैयाँको साँवा रकम समेत फिर्ता नगरी संस्था नै बन्द गरेका थिए ।

त्यस पछि ठगी गरेको भन्दैं बचतकर्ताले विभिन्न निकायमा उजुरी गरेपछि उनिहरुको कुकर्म बाहिरीएको थियो । अदालतले प्रतिवादी रोशन श्रेष्ठको हकमा दामासायीबाट हुन आउने उक्त रकम बिगो कायम गरी सोही बमोजिम जरिवाना गरेको थियो । पक्राउ प्रतिवादी रोशन श्रेष्ठलाई बिहीबार फैसला कार्यान्वयनको लागि काठमाडौं जिल्ला अदालतमा पेश उपस्थित भएका थिए ।