कर्णालीमा मन्त्रालयको भागबण्डामै सकस, आज सानो आकारको मन्त्रीमण्डल बन्ने

१२ वैशाख, सुर्खेत । कर्णाली प्रदेशमा दलहरूबीच भागबन्डा नमिलेर मन्त्रिपरिषद बन्न सकेको छैन । आज सानो मन्त्रिपरिषद बनाएर मुख्यमन्त्री यमलाल कँडेलले बिहीबार विश्वासको मत लिने तयारी गरेका छन् । त्यसअघि कँडेलले सानो आकारको मन्त्रिमण्डल आज गठन गर्ने भएका हुन् । 

आज मुख्यमन्त्री कँडेलले एमाले र माओवादी केन्द्रका एक/एक सहभागी गराएर मन्त्रिमण्डल गठन गर्ने तयारी गरेका छन् । कर्णाली प्रदेशमा नेकपा माओवादीका तर्फबाट कर्णसिंह परियार मन्त्री बन्ने भएका छन् । बुधबार बिहान बसेको माओवादी संसदीय दलको बैठकले परियारलाई सरकारमा पठाउने निर्णय गरेको हो । अन्य मन्त्रालयको टुंगो लागेको छैन । 
 
आज माओवादीको तर्फबाट परियारलाई पठाउने, मन्त्रालय र बाँकी मन्त्रीको टुंगो मुख्यमन्त्री यमलाल कँडेलले विश्वासको मत लिइसकेपछि थप विस्तार गर्ने भएका छन् । मुख्यमन्त्री कँडेलले बिहीबार विश्वासको मत लिएपछि मन्त्रिमण्डललाई पूर्णता दिने बताएका छन् । आज एमालेका तर्फबाट पनि एक जना मन्त्रिमण्डलमा सहभागी हुने एमाले कर्णाली प्रदेश संसदीय दलले जनाएको छ ।