अमेरिकी वायुसेवा कम्पनीका दुई विमानचालक पक्राउ

एजेन्सी । अमेरिकी वायुसेवा कम्पनी युनाइटिड एअरलाइन्सका दुई विमानचालक मादक पदार्थ सेवन गरेका कारण पक्राउ परेका छन् ।

दुई विमान चालक मादक पदार्थ सेवन गरेर विमान उडाउन जान लागेका बेला ग्लास्गो विमानस्थल बाट उनीहरु पक्राउ परेका हुन् ।

पैँतालीस र ६१ वर्षीय विमानचालकहरूलाई कुनै पनि अभियोग भने नलगाइएको अन्तराष्ट्रिय समाचार संस्था बिबिसीले उल्लेख गरेको छ । प्रहरी हिरासतमा रहेका उनीहरू मङ्गलवार अदालतमा उपस्थित हुने अपेक्षा गरिएको छ।

स्कटल्यान्ड प्रहरीले आफूहरूलाई विमानस्थल बोलाइएको पुष्टि गरेको छ। यूए १६२ ले उडान गर्नुअघि त्यसका चालकहरू पक्राउ परेका हुन्।

सन् २०१७ मा पनि युनाइटिड एअरलाइन्सकै दुई विमानचालकलाई मदिरा सेवन गरेको आरोपमा ग्लास्गो विमानस्थलबाटै नियन्त्रणमा लिई जेल चलान गरिएको थियो।

त्यतिखेर ३५ वर्षीय पल ग्रेबेन्सलाई १० महिना जेल सजाय सुनाइएको थियो भने उनका सहकर्मी ४५ वर्षीय कार्लोस अक्टोबर लीकोनालाई १५ महिना सजाय तोकिएको थियो।