पुर्व पश्चिम महेन्द्र राजमार्गमा बनेका खाल्डा मर्मत नहुँदा यात्रा जोखिम पूर्ण बन्दै

मिना कंडेल
कावासोती । पूर्व पश्चिम राजमार्गमा वनेका ठुला ठुला खाल्डाखुल्डी मर्मत हुन नसक्दा यात्रा गर्नेहरुको जीवन जोखिमपूर्ण बन्दै गएको छ । लामो समय भएको भएपनि यस प्रति सम्बन्धित पक्षको ध्यान पुग्न नसक्दा सवारी चालक तथा यात्रुहरुलाई समस्या पर्न गएको हो ।

पूर्व पश्चिम महेन्द्र राजमार्ग अन्तर्गत बुटवल–नारायणगढ खण्डमा हजारौं ठुला ठुला खाल्डा परेपछि दुर्घटनाको जोखिम दोब्बरले बढेको कावासोतीका सागर क्षेत्रीले बताए । राजमार्गको मुख्य बजार क्षेत्रमा कालोपत्रे उप्किएर ठूल्ठूला खाल्डा बनेको दुई महिना बितिसक्दा पनि मर्मत नभएपछि दुर्घटनाको जोखिम बढेको हो ।

दुई महिनादेखि परेको खाल्डाखुल्डीका कारण दुर्घटना सय प्रतिशतले बढेको जिल्ला प्रहरी कार्यालयले जनाएको छ । सडकमा रहेका खाल्डा खुल्डी त्यसमा पनि पानी जम्ने भएका कारण सवारी साधनहरु बढि दुर्घटनामा पर्ने गरेको प्रहरी उपरीक्षक मोहनप्रसाद पोखरेलले बताए । तत्काल खाल्डा खुल्डी पुर्न आफुले सडक डिभिजन कार्यालय र नगरपालिकालाई अनुरोध गरेको प्रहरी प्रमुख पोखरेलले बताउछन् ।

देवचुली , कावासोती, दुम्किबास, अरुणखोला, दाउन्ने, बर्दघाट, सुनवल बजारमा नै हजारौं ठुल्ठूला खाल्टा बनेका छन् । राजमार्गमा खाल्डाले गाडी हिँडाउनै नमिल्ने अवस्था छ भने मुख्य राजमार्गमा बाटो काट्न समेत पैदल यात्रुलाई समस्या हुने गरेको स्थानीय गौरीशंकर न्यौपाने बताउछन् ।

पूर्वी नवलपरासीका प्रमुख जिल्ला अधिकारी विष्णुकुमार कार्कीले डिभिजन सडक कार्यालय बर्दघाटलाई पटक पटक टेलिफोन गरी समस्याको समाधान खोज्नका लागि बोलाउँदा पनि अटेर गर्दै आएको बताए । प्रमुख जिल्ला अधिकारी कार्कीले तत्काल सडक पुर्ने सडक कार्यालयले आश्वासन दिएको बताए । कुनै पनि राजमार्गमा खाल्डा बनेको २४ घण्टाभित्रै पुरिसक्न पर्ने सडकको नियममा ब्यबस्था भए पनि यस्ता नियमको सडक डिभिजन कार्यालयले उल्टै पँगु बनाईदिएको यातायात ब्यबसायी मोहन पाठकले बताए ।

सडकका ईन्जीनियर शिव खनालले बुटवल नारायणगढ सडक खण्ड अब निर्माणको तयारीमा रहेकाले मर्मततर्फ सडक डिभिजनले खासै ध्यान नदिए पनि सडकको मर्मत भने थालिने बताए ।