पाकिस्तानले भारतविरुद्ध फेरि लेख्यो संयुक्त राष्ट्रसंघलाई चिट्ठी

१२ भदौ, एजेन्सी । भारत प्रशासित कश्मीरको विषयमा पाकिस्तानले फेरि संयुक्त राष्ट्रसंघलाई पत्र लेखेको छ ।पाकिस्तानले संयुक्त राष्ट्रसंघको सबैभन्दा शक्तिशाली निकाय सुरक्षा परिषदलाई कश्मीर मुद्दाबारे फेरि चिट्ठी लेखेको हो ।

विदेशमन्त्री शाह महमूद कुरैशीले संयुक्त राष्ट्रसंघ सुरक्षा परिषदका अध्यक्षलाई लेखेको पत्रमा भारत प्रशासित जम्मू–कश्मीरमा मावनअधिकारको अवस्था गम्भीर संकटपूर्ण रहेको र त्यहाँको अवस्था सर्वसाधारणका लागि कठिन रहेको उल्लेख गरेका छन् ।

यो जानकारी पाकिस्तानको विदेश मन्त्रालयका प्रवक्ताले वक्तव्य जारी गरेर दिएका हुन् । कश्मीरमा तीन हप्तादेखि लकडाउनको अवस्था रहेको र त्यसलाई तत्काल हटाउनु पर्नेमा विदेश मन्त्री कुरैशीले जोड दिएको वक्तव्यमा उल्लेख छ ।

पाकिस्तानले सुरक्षा परिषदसँग ‘भारत र पाकिस्तानमा संयुक्त राष्ट्रसंघ सैन्य अनुगमन समूहको संख्या दोब्बर बनाउन’ आग्रह गरेको छ । यस्तै अनुगमनकर्तालाई नियन्त्रण रेखा पारी जान भारतलाई सहमत गराउन पनि पाकिस्तानले सुरक्षा परिषदसँग आग्रह गरेको छ ।

पाकिस्तानका मानवअधिकार मन्त्री शीरिन मजारीले ट्वीट गरेर राष्ट्रसंघलाई लेखिएको पत्रबारे जानकारी दिएका छन् । उनले सो पत्र नै ट्वीट गरेका छन् ।

यसैबिच कश्मीरका सम्बन्धमा व्यक्त बयानप्रति भारतीय कांग्रेस र नेता राहुल गान्धीले माफी माग्नु पर्ने नरेन्द्र मोदी सरकारका केन्द्रीय मन्त्री तथा भाजपा नेता प्रकाश जावडेकरले माग गरेका छन् ।

राहुल गान्धीले कश्मीरका सम्बन्धमा व्यक्त गरेको अभिव्यक्ति पाकिस्तानले राष्ट्रसंघमा लेखेको पत्रमा प्रयोग गरेकाले त्यसका लागि माफी माग्नु पर्ने उनले दाबी गरेका हुन् । राहुल गान्धीका कारण देशको छबी गलत रुपमा प्रस्तुत भएको उनको आरोप छ ।

तर राहुल गान्धीले यसअघि नै आफ्नो भनाई र अडान स्पष्ट पारेका छन् भने पाकिस्तानको आलोचना पनि गर्दै आएका छन् ।