जनआक्रोश छल्न नेकपाले जगायो ज्ञानेन्द्रको भूत

१७ भदौ, काठमाडौं । सत्तारुढ दलका प्रमुख नेताहरु भन्छन् :– देशमा लोकतन्त्र र संविधान खतरामा छ । लोकतन्त्र वहाल भएको १२/१३ वर्षमा नै लोकतन्त्र धरापमा परेकै हो त ? जानकार भन्छन् :– सब वाहियात हो । जनताको आक्रोश र निराशाबाट बच्न छट्टु नेताहरुको चालबाजी मात्र हो । यही भदौको ३ गते प्रधानमन्त्री खड्गप्रसाद ओलीले सरकारी निवास बालुवाटारमा सर्वदलीय बैठक नै डाकेका यस्तो उद्घोष गरेका थिए । सर्वदलीय बैठकमा छलफलको विषय थियो :– लोकतन्त्र र संविधानविरुद्ध भयानक षडयन्त्र भइरहेको छ ।

सर्वदलीय बैठकमा ओलीले कड्किएर भनेका थिए :– लोकतान्त्रिक प्रणालीविरुद्ध नै आवाज उठ्न थालेका छन् । यो दुस्साहस कहाँबाट आयो ? बढ्दो हिंसाविरुद्ध शान्तिका पक्षमा सरकार एक्लै लड्ने की विपक्षीले पनि साथ दिने ? ओलीले डाकेको बैठकमा यस्तो गम्भिर विषयमा छलफल हुँदा कांग्रेस मौन जस्तै बस्यो । तर कसैले पनि कसबाट र कस्तो खतरा छ भनेर चाहिं प्रधानमन्त्रीसँग बुझ्ने चेष्टा गरेनन् ।

जबकी कांग्रेसले यो विवादास्पद अभिव्यक्ति दिने प्रधानमन्त्रीलाई ¥याख¥याख्ती पार्न सक्नु पथ्र्याे । गत फागुनमा ओली नेतृत्वको सरकारले नेत्र विक्रम चन्द विप्लबको नेकपा माओवादीलाई आतंककारी घोषणा गरेको थियो । सर्वदलीय बैठकमा विप्लब र पूर्व राजा ज्ञानेन्द्रबाट नै यस्तो खतरा रहेको ओली र प्रचण्डले स्पष्ट संकेत गरे ।

ओलीले लोकतन्त्रमाथि खतरा भएको बताइरहँदा उनी इतिहासकै सर्वशक्तिमान प्रधानमन्त्री रहेको हेक्का राखेनन् । वास्तवमा भन्ने हो भने ओलीको अदूरदर्शिता र अहंकारले नै लोकतन्त्र खतरामा परेको हो । घटनाक्रमलाई जोडेर हेर्ने हो भने सत्तारुढ नेकपा योजनावद्ध रुपमा लोकतन्त्रलाई कमजोर बनाउन सकृय देखिन्छ । जनभावना विपरित भ्रष्ट र कमिशनखोरको मतियारका रुपमा रहेको सरकारप्रति जनतामा चरम निराशा र असन्तोष छ ।

जनतासँग एकाकार हुन नसकेका ओली र प्रचण्ड पानीमाथि ओभानो देखिन यस्ता नाटक रचिरहेका छन् । ओली र प्रचण्डबीच पटक पटक छलफल भएर यस्तो नौटंकी गरिएको बुझ्न कठिन छैन । गत साउन १९ गते रामेछापमा आयोजित एउटा कार्यक्रममा नेकपा अध्यक्ष पुष्पकमल दाहाल प्रचण्डले पूर्व राजा ज्ञानेन्द्रप्रति लक्षित गर्दै भनेका थिए :– नागार्जुनमा सुरक्षासहित बस्न दिएकोमा संविधानकै खिलाफ बकबक गर्न थालेका छन् ज्ञानेन्द्र । यस्तो गर्दै जाने हो भने जनता चूप लागेर बस्ने छैन भन्दै प्रचण्डले लोकतन्त्रमाथि धावा बोल्ने काम ज्ञानेन्द्रबाट भएको उनको आरोप थियो ।

लगत्तै प्रधानमन्त्री ओलीले प्रचण्डकै भनाईलाई बल पुग्ने गरी अभिव्यक्ति दिए । भदौ १ गते प्रतिनिधिसभामा बोल्दै ओलीले भनेका थिए :– सरकारको आलोचनाको नाममा लोकतान्त्रिक प्रणाली नै उल्टाउन खोज्ने, प्रतिगमनको मतियार बन्ने र संविधान मान्दिन भन्ने कुरा स्वीकार्य हुन सक्दैन । चिहानमा गएर हड्डी फुकेर राजसंस्था फर्काउँछु भन्ने परिकल्पना गरेर कोही उफ्रन खोज्दै छन् । तर त्यो मनसुवा पूरा हुन सक्दैन ।

नेकपाका दुबै अध्यक्षबाट एउटै समयमा एकैखालका अभिव्यक्ति सार्वजनिक हुनु केवल संयोग मात्र होइन । यो नियोजित रुपमा आएको हो :– राजनीतिक विश्लेषक डा. सुरेन्द्र के सीको भनाई छ । दुई तिहाई समर्थन प्राप्त सरकारले जनअपेक्षा बमोजिम कुनै काम गर्न नसकेकाले जनताको ध्यान अयन्त्रै मोड्नका लागि नेकपाको यो चटक मात्र हो :– डा. के सीको ठहर छ ।

नेपालको संविधान र गणतन्त्रमा खतरा आयो भनेर स्याल हुइँया चलाउने ओली र प्रचण्डको गलत नियत देखिएको उनले आरोप लगाए । आम नागरिकको आक्रोश र असन्तुष्टीलाई व्यवस्थापन गर्न नसक्ने लाक्षीहरुले यस्तो चटक देखाउने हुन् :– के सी भन्छन् राजगद्दी नै जनतालाई सुम्पिएर बसेका ज्ञानेन्द्रको नाममा राजनीति गर्ने दुस्प्रयास मात्र हो । “नाँच्न नजान्नेले आँगन टेढो नै देख्छ” के सी भन्छन्, “अहिले साँच्चै लोकतन्त्र र संविधानमाथि खतरा छ भने नेकपाबाट मात्रै छ ।”

नेकपाका दोस्रो तहका नेताहरु भने लोकतन्त्र र संविधानमा त्यत्रो संकट नभएको बताउँछन् । नेकपाका केन्द्रीय सदस्य जगन्ननाथ खतिवडाले कोठा भित्र यस्ता कुरा गर्न सकिएला, तर सार्वजनिक रुपमा भन्दा आफ्नै कमजोरी देखिने बताउँछन् ।
नेताहरुले यस्ता कुरा किन गर्नु भयो थाहा भएन, तर अहिले लोकतन्त्र र संविधान कमजोर भयो भने त्यसको दोष हामीले लिनु पर्ने हुन्छ , खतिवडाले भनेका छन् । जनतामा निराशा र आक्रोश बढाउने खालको अभिव्यक्ति कसैले पनि दिन नहुने उनको धारणा छ ।

उता, प्रमुख प्रतिपक्ष कांग्रेस भने यस्तो संवेदनशील विषयमा मौन छ । नेकपाका अध्यक्षद्वयले के आधारमा यस्ता अभिव्यक्ति दिए भनेर न त संसद्मा जवाफ खोज्छ न सडक नै तताउन सकेको छ । प्रजातन्त्रका लागि पटक–पटक संघर्ष गरेको कांग्रेस लोकतन्त्र धरापमा परेको भनेर कार्यकारी प्रमुखले भन्दा समेत स्पष्टीकरण लिन चुकेको छ । यसले पनि कांग्रेस नेतृत्वको निकम्मापन र गैरजिम्मेवारी छताछुल्ल भएको छ । जे भएपनि सरकार अलोकप्रिय भएको बेला अन्यत्रै ध्यान आकृष्ट गर्न ओली र प्रचण्डले यस्ता गैर जिम्मेवार कुरा बोलेकोमा धेरैको सहमति छ ।