प्रहरी बुलेटिन अपडेट : सवारी दुर्घटनामा परी ३ जनाको मृत्यु !

१६ असोज, काठमाडौं । महानगरिय प्रहरीले देशैभर घटेका प्रहरी बुलेटिनहरु सावैजनिक गरेको छ । हरेक दिन देशैभर भएका घटना दुर्घटना प्रहरी विभागले बुलेटिनका रुपका सार्वजनिक गर्दै आइरहेको छ ।

प्रहरी बुलेटिनका अनुसार जनकपुर उपमहानगरपालिका-४ जनक चोकबाट नियन्त्रित लागूऔषध नाईट्राभेट ट्याबलेट ९ पिस सहित ३ जनालाई बुधबार राति प्रहरीले पक्राउ गरेको छ ।

पक्राउ पर्नेहरुमा सबैला नगरपालिका-३ बस्ने २० वर्षीय प्रबिण कुमार यादब, १९ वर्षीय राम शर्मा र २० वर्षीय मुकेश साह रहेका छन् । प्रहरी चौकी जनकपुरधामबाट खटिएको प्रहरीले स.१० प ८८९८ नम्बरको मोटरसाइकल जाँच गर्ने क्रममा मोटरसाइकलमा सवार उनीहरुलाई उक्त परिमाणको लागूऔषध सहित फेला पारी पक्राउ गरेको हो ।

यस्तै कास्की, धनकुटा र मकवानपुरका विभिन्न स्थानमा भएका छुट्टाछुट्टै सवारी दुर्घटनामा परी ३ जनाको मृत्यु भएको छ ।कास्कीको पोखरा महानगरपालिका-७ स्थित सडकमा ग.१४ प ५२०५ नम्बरको मोटरसाइकल अनियन्त्रित भई बुधबार राति दुर्घटना हुँदा गम्भीर घाइते भएका चालक पोखरा महानगरपालिका-८ नागढुङ्गा बस्ने २२ वर्षीय फिन्जु लामा शेर्पाको गण्डकी मेडिकल कलेजमा उपचारको क्रममा मृत्यु भएको छ ।

धनकुटा, चौबिसे गाउँपालिका-३ गढीगाउँस्थित सडकमा को.२ त २८३६ नम्बरको ट्याक्टरबाट लडेर गम्भीर घाइते भएका सोही ठाउँ बस्ने १७ वर्षीय लक्ष्मण तामाङको घोपा अस्पताल धरानमा उपचारको क्रममा बुधबार राति मृत्यु भएको छ । ट्याक्टर र चालकलाई प्रहरीले नियन्त्रणमा लिएको छ ।

मकवानपुर, हेटौंडा उपमहानगरपालिका-११ भैरवडाँडास्थित सडकमा ना.६ त ४५३७ नम्बरको ट्याक्टर अनियन्त्रित भई बिहीबार बिहान दुर्घटना हुँदा चालक सोही उपमहानगरपालिका-९ बस्ने १९ वर्षीय सौरब दर्लामीको घटनास्थलमै मृत्यु भएको छ । दुर्घटनाका सम्बन्धमा स्थानीय प्रहरीले थप अनुसन्धान गरिरहेको छ ।

यता झापाको दमक नगरपालिका-५ संगम टोल बस्ने ४० वर्षीय चिन्टु माझीको करेन्ट लागेर बुधबार राति मृत्यु भएको छ ।
आफ्नै घर अगाडि पानी जमेको नालीमा करेन्ट लगाई माछा मार्ने क्रममा करेन्ट लागेर गम्भीर घाइते भएका उनको लाईफ-लाईन अस्पताल दमकमा उपचारको क्रममा मृत्यु भएको हो ।

इता, कपिलवस्तुको यसोधरा गाउँपालिका-८ शिवपुर बस्ने ५८ वर्षीय नन्दलाल तेलीको गोठमा बिहीबार बिहान आगलागी हुँदा गोठ, गोठभित्र रहेको लु.१३ प १९४१ नम्बरको मोटरसाइकल तथा पानी तान्ने पम्पसेट पूर्णरुपमा जलेर करिब ४ लाख ४५ हजार रुपैयाँ बराबरको धनमाल नष्ट भएको छ । आगो निभाउने क्रममा नन्दलाल तेली समान्य घाइते भएका छन् ।

स्थानीय बासिन्दाको सहयोगमा प्रहरीले आगलागी नियन्त्रणमा लिनुका साथै यस सम्बन्धमा थप आवश्यक अनुसन्धान गरिरहेको छ ।