दैलेखमा लास बोकेको ट्रयाक्टर दुर्घटना, एक जना घाइते !

अमर सुनार

२२ असोज, दैलेख । विजया दशमी दिन मंगलबार हिजो साँझ खोलाले बगाएर मृत्यू भएका दम्पतीको लास दाहसंस्कार गर्न कोटिला जाँदै गरेको लु २ त ४६९३ नम्बरको ट्रयाक्टर महाबैथान नजिक दुर्घटना हुँदा एक जना महिलाको घाइते भएकी छिन् ।

दैलेखको नारायण नपा-२ कुसाडाकी ४८ वर्षकी पूर्णा बि.क को दाहिने हात भाँचिएको छ । ट्रयाक्टरमा सवार १७ जना अरुलाई सामान्य चोट लागेको छ ।

सिकारु चालकले सन्तुलन गुमाएपछि ट्रयाक्टर सडकमै पल्टेको प्रहरीले जनाएको छ । ट्रयाक्टर चालक दशैं विदामा गएको कारण सिकारु चालकले ट्रयाक्टर चलाएका थिए । स्थानीयले घाइतेको उद्धार गरी उपाचारको लागि दैलेख अस्पताल पुराएका छन्।

दुल्लू नपा-११ कालभैरका ४५ वर्षका इन्द्रबहादुर सुनार र उहाँकी श्रीमती ४० वर्षकी खगिसरा सुनार नारायण नपा-२ कुसाडास्थित माइतीमा दशैं मान्न जाँदा छामघाट खोलाले कोटिलाघाटबाट बगाउदा दुबै जनाको ज्यान गएको थियो ।

दैलेख जिल्ला अस्पतालमा मृतकहरुको शव परीक्षणपछि दाहसंस्कार गर्न लास लैजाँदै गर्दा कोटिला जाने बाटोमा गेट नजिकै ट्रयाक्टर पल्टेको हो ।