लोकाहापुलमा भेटिएको शंकास्पद वस्तु बम नभएको पुष्टि

मिना कंडेल

१८ कार्तिक, नवलपुर । पूर्वी नवलपरासीको देवचुलि १५ लोकाहापुलको ग्याबिनमाथी भेटिएको शंकास्पद वस्तुमा विष्फोटक पदार्थ नभएको पुष्टि भएको छ ।

सोमवार बिहान रातो झोलामा कालो टेपले बेरेर बिजुलीको रातो–कालो तारको टुप्पो देखिने गरी प्याक गरेको अवस्थामा नवलपुरको कावासोती र देबचुली नगरपालिकाको सिमानामा रहेको पूर्वपश्चिम मुख्य मार्गको लोकाहामा शंकास्पद बस्तु भेटिएको थियो । बिहानै पुलको नजिकै शंकास्पद वस्तु रहेको सुचना पाएलगत्तै प्रहरी र सशस्त्रले सो स्थानमा घेरा हालेका थिए ।

करीब सवा नौ बजे झ्याल्टुङडाँडाबाट नेपाली सेनाको बम डिस्पोजल टोली आएपश्चात् बिहान ११ वजे शंकास्पद वस्तुलाई निस्क्रिय पारिएको थियो । निस्क्रिय पार्ने क्रममा भने बिस्फोटको आवाज आएको थियो । उक्त बस्तु बम नै नभए पनि सर्वसाधारणलाई बमको त्रासमा डर उत्पन्न गराउने होंक्स भएको जिल्ला प्रहरी कार्यालय नवलपुरका डिएसपी अर्जुन रानाभाटले जानकारी दिए ।

प्रहरीका अनुसार उक्त बिस्फोटको आवाज निस्क्रिय पार्ने क्रममा अपनाईने विधी हो । सेनालाई उक्त वस्तु पहिचान गर्न र निस्क्रिय पार्न २ घण्टा समय लागेको थियो । डिएसपी रानाभाटका अनुसार रातो झोलामा प्याक गरिएको उक्त पोको भित्र टिनको डब्बामा ढुंगा–माटो रहेको थियो ।