आज प्रधानमन्त्री ओलीले सागमा सहभागी खेलाडीलाई सम्बोधन गर्ने

१० मंसिर काठमाडौं । प्रधानमन्त्री केपी शर्मा ओलीले दक्षिण एसियाली खेलकुद सागको १३ औँ संस्करणमा सहभागी हुने सबै खेलाडीलाई मंगलबार सम्बोधन गर्दै छन् ।

प्रधानमन्त्री ओलीले सबै खेलाडी तथा पदाधिकारीसँग काठमाडौँमा भेट्नका लागि बोलाएका छन् । मंगलबार बिहान ११ बजे प्रधानमन्त्री ओलीले प्रज्ञा प्रतिष्ठानमा खेलाडी तथा पदाधिकारीलाई सम्बोधन गर्ने कार्यक्रम रहेको र त्यसका लागि बसैलाई काठमाडौं आएको राष्ट्रिय टिम तयारी समितिका संयोजक रिम रानाभाटले जानकारी दिएका छन् ।

यसले गर्दा काठमाडौँसहित पोखरा र ललितपुरमा बन्द प्रशिक्षणमा रहेका खेलाडीहरुको प्रशिक्षण प्रभावित भएको हो । १३ औँ सागको उद्घाटन यहि मंसिर १५ गते हुँदैछ । प्रधानमन्त्री ओलीले मंगलबार खेलाडीका लागि केही प्याकेज घोषणा गर्ने तयारी गरेका छन् ।

हालसम्म सागमा पदक जित्ने खेलाडीलाई दिइँदै आएको नगद पुरस्कारमा वृद्धि गर्ने तयारीमा प्रधानमन्त्री रहेको बताइएको छ । हालसम्म स्वर्ण पदक जित्नेलाई तीन लाख, रजत जित्नेलाई दुई लाख तथा काश्य पदक जित्नेलाई एक लाख रुपैयाँ नगद पुरस्कार दिइँदै आएको छ ।