प्रधानमन्त्री ओली अझै केही दिन आईसीयूमै !

१४ मंसिर काठमाडौं । मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा उपचाररत प्रधानमन्त्री केपी शर्मा ओलीलाई अझै आईसीयूमा राखिएको छ ।  सम्भावित संक्रमणबाट जोगाउन प्रधानमन्त्री ओलीलाई आईसीयूमै राखिएको हो ।

चिकित्सकका अनुसार प्रधानमन्त्रीको स्वास्थयमा सुधार भएपनि पूर्ण रुपमा स्वस्थ हुन भने अझै १० दिन लाग्नेछ । उपचारमा संलग्न डा. सुवास आचार्यका अनुसार पेटको घाउ आलै रहेका कारण बाहिर सारे अन्य संक्रमण हुने जोखिम भएकाले प्रधानमन्त्री ओलीलाई आईसीयूमै राखिएको हो ।

चिकित्सकका अनुसार स्वास्थ्य अवस्था, क्षमता, गतिशीलता, खानपान हेरेर आईसीयूबाट बाहिर राख्ने विषयमा निर्णय गरिनेछ । ‘एपेन्डिसाइटिस’ सहित ‘पेरिटोनाइटिस’ (पेटको संक्रमण) देखिएपछि मंगलबार प्रधानमन्त्री ओलीको उक्त सेन्टरमा शल्यक्रिया गरिएको थियो ।

यसैबिच, नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ’प्रचण्ड’ले प्रधानमन्त्री केपी शर्मा ओलीलाई भेटेर स्वास्थ्य अवस्था बारे जानकारी लिएका छन् ।  प्रधानमन्त्री ओली र प्रचण्डबीच झण्डै पाँच मिनेट कुराकानी भएको प्रचण्डका प्रेस सल्लाहकार विष्णु सापकोटा जुगलले जानकारी दिए ।

प्रचण्डसँगको भेटमा ओलीले आफ्नो स्वास्थ्य अवस्था राम्रो भएको बताए। भेटका क्रममा नेकपा अध्यक्ष प्रचण्डले प्रधानमन्त्रीको स्वास्थ्य अवस्था बारेमा चिकित्सकसँग पनि जानकारी लिएको र चिकित्सकहरुले प्रधानमन्त्रीको स्वास्थ्य अवस्थामा उल्लेखनीय सुधार भैरहेको जानकारी दिएका छन् ।

प्रधानमन्त्री ओलीको गत मंगलबार त्रिभुवन विश्वविद्यालय शिक्षण अस्पतालका डा.रमेशसिंह भण्डारीको टोलीले एपेन्डिसाइटिसको अपरेसन गरेका थिए ।