निर्वाचन परिणामबारे नेकपामा दुई धार

१८ मंसिर, काठमाडौ । सत्तारुढ नेपाल कम्युनिष्ट पार्टीको आज बसेको सचिवाल बैठकको निश्कर्ष हो – भर्खरै सम्पन्न निर्वाचनमा अन्तर्घात भएन । खासगरी भक्तपुरको प्रदेश सभा र धरान नगरपालिकाको मेयर पद गुमाएपछि आत्तिएका नेताहरुले समीक्षात्मक बैठकमा यस्तो निश्कर्ष निकाले ।

अहिले सत्तामा रमाएका पक्षले निर्वाचन परिणामलाई स्वभाविक र नेकपाको पक्षमा जनमत रहेका कोणबाट व्याख्या गरे भने सत्ता बाहिर रहेकाहरुको बुझाई भने बेग्लै रह्यो ।

वैठकमा प्रधानमन्त्रीका प्रमुख राजनीतिक सल्लाहकार विष्णु रिमालले उपनिर्वाचन परिणाम गत निर्वाचन भन्दा बेग्लै नरहेका टिप्पणी गरे ।

उता, पूर्वप्रधानमन्त्री समेत रहका वरिष्ठ नेता झलनाथ खनालले चाहिं निर्वाचन परिणामले वामपन्थीलाई निराश तुल्याएको बताए । भक्तपुर र धरान कम्युनिष्टको लाल किल्ला भएपनि पराजयको पीडा भोग्नु परेकोमा सरकारको अलोकप्रियतासँग जोडेर यस्तो टिप्पणी गरेका हुन् ।

आजै सम्पन्न सचिबालय बैठकले उपनिर्वाचनको समीक्षा प्रतिबेदन पठाउन मातहत कमिटीलाई निर्देशन दिएको छ । पार्टी केन्द्रीय कार्यालय धुम्बाराहीमा बसेको बैठकले उपनिर्वाचनमा सहभागी वडा तहदेखि जिल्ला तहसम्मका कमिटीलाई तत्काल प्रतिवेदन बुझाउन निर्देशन दिएको छ ।

सचिबालयको आगामी बैठक यही मंसिर २३ मा बस्ने भएको छ । आजको बैठकले निर्वाचन परिणामको गहन समीक्षा नगरेपनि प्रधानमन्त्री खड्गप्रसाद ओलीलाई स्वास्थ लाभको कामना गरेको छ । प्रधानमन्त्रीको स्वास्थमा उल्लेख्य सुधार भएको भन्दै बैठकले शीघ्र स्वास्थ लाभको कामना गरेको छ ।