नेकपा स्थायी कमिटीका लागि पाँच अजेण्डा तय, होला त वामदेवको प्रवेश

२९ मंसिर, काठमाडौं । सत्तारुढ नेपाल कम्युनिष्ट पार्टी (नेकपा)को आज बस्ने स्थायी कमिटी वैठकका लागि अजेण्डा तय गरिएको छ । विहान बसेको सचिबालय वैठकले अपरान्ह बस्ने स्थायी कमिटी वैठकमा छलफल गर्न विभिन्न पाँच वटा अजेण्डा तयार गरेको हो ।

प्रधानमन्त्री खड्गप्रसाद ओलीसमेत सहभागी रहेको आजको बैठकले राजनीतिक प्रतिवेदन, विधान संशोधन, केन्द्रीय कमिटी वैठक बोलाउने, भारतसँगको सीमा विवादलगायतको अजेण्डा तय गरेको छ ।

पार्टी प्रवक्ता नारायणकाजी श्रेष्ठका अनुसार, आज अपरान्ह बस्ने स्थायी कमिटी बैठकमा मूलतः यिनै विषयमा छलफल गरिने छ । एक वर्ष पछि बस्न लागको स्थायी कमिटी वैठकले यस अघि सचिवालयले गरेका निर्णयलाई अनुमोदन गर्ने कार्यक्रम रहेको छ ।

साथै पार्टी विधानमा नरहेको उपाध्यक्ष पद सिर्जना गर्न समेत स्थायी कमिटी वैठकले अनुमति दिने छ । यस्तो व्यवस्था हुने वित्तिकै उपाध्यक्षमा वामदेव गौतमलाई काम गर्न बाटो खुल्ने छ ।