प्रथम मणिपाल न्युरो सम्मेलन सफलतापूर्वक सम्पन्न

३० मंसिर पोखरा । पोखरामा प्रथम पटक मणिपाल न्युरो सम्मेलन सम्पन्न भएको छ । मणिपाल मेडिकल कलेजको २५ औं बार्षिक उत्सबका अवसरमा नेपाल न्यूरो सर्जिकल सोसाइटी, मणिपाल मेडिकल कलेज एवम् ब्रेन एण्ड स्पाइनल फाउण्डेशन नेपालको आयोजनामा न्युरो सम्मेलन गरिएको हो ।

मंसिर २७ र २८ गते गरिएको सम्मेलनमा पहिलो दिन भारतका प्राध्यापक डा. सतिशचन्द्र गोरे र प्राध्यापक डा. रविन्द्रनाथ कोमी तथा मणिपाल मेडिकल कलेजका न्युरो सर्जरी विभागका सहप्राध्यापकद्वय डा. बालगोपाल कर्माचार्य र डा. निकुञ्ज योगीको टोलीले बेहोस नबनाई दुरबिनबाट गरिने ढाडको अपरेशन सफलतापूर्वक सम्पन्न गरेको डा. योगीले जानकारी दिए ।

सम्मेलनको दोस्रो दिन नेपालका प्रथम न्युरो सर्जन स्वर्गीय डा.उपेन्द्र देवकोटाको सम्झनामा विशेष कार्यक्रम गरिएको थियो । दोस्रो दिनमै ५३ वटा क्लिनिकल रिसर्चका बारेमा सहभागीहरु बीच छलफल गरिएको डा.योगीले बताए ।

मणिपाल मेडिकल कलेजका डिन डा. बिएम नागपाल तथा नेपाल न्युरो सर्जिकल सोसाइटीका अध्यक्ष डा. कृष्ण शर्माले दिप प्रज्ज्वलन गरी शुरु गरिएको न्युरो सम्मेलनमा देश विदेशका गरी करिब १ सय ३० जना न्युरो सर्जन, न्युरोलोजिष्ट, स्पाइनल सर्जन, फिजियोथेरापिष्ट र नर्सहरुको सहभागिता थियो ।

सम्मेलनमा नेपालका बरिष्ठ न्युरो सर्जन डा।बसन्त पन्त, डा.निलम खड्का, न्युरोलोजिष्ट डा।लेखजंग थापा लगायत सहभागी थिए । बेहोस नबनाई दुरबिनको प्रयोग गरेर ढाडको अप्रेशन गरिएका विरामीहरुले आफूहरु अप्रेशन लगत्तै हिंड्डुल गर्न सकेको र कुनै दुःखाई महसुस नगरिएको बताएका थिए ।

देशकै दुर्लभ यसखाले अप्रेशनका लागि मणिपाल मेडिकल कलेजले पनि छिट्टै यो प्रविधिको सुरुवात गर्ने प्रतिबद्धता जनाएको छ ।

कलेजका डिन डा.नागपालले सम्मेलन सफलतापूर्वक सम्पन्न भएकोमा खुसी ब्यक्त गरेको न्युरो सर्जन डा. योगीले बताए। सम्मेलन संचालनमा न्युरो अस्पताल बाँसबारीका डा. रचना नकर्मी लगायतको टिमले सक्रिय भूमिका निभाएका थिए ।