आलमको मुद्दा पर्सामा सार्ने कि नसार्ने ?

१८ पुस वीरगन्ज । पुर्पक्षका लागि कारागारमा रहेका रौतहटका मोहमद अफताव आलम प्रतिवादी रहेको कर्तव्य ज्यान तथा ज्यान मार्ने उद्योगको मुद्दा पर्सामा सार्ने नसार्ने किनारा आगामी २ माघमा मात्र लाग्ने भएको छ ।

रौतहट जिल्ला अदालतमा सो मुद्दाको स्वच्छ सुनुवाइमा असर पर्ने भन्दै वादीका तर्फबाट नारायणसिंह राजपुतसहित नेपाल सरकारले पर्सामा मुद्दाको सुनुवाइ सार्न चाहेको विषयमा बिहीबार सार्ने नसार्ने किनारा लाग्न नसकेको हो ।

उच्च अदालत जनकपुरको अस्थायी इजलास वीरगन्जका मुख्य न्यायाधीश डिल्लीराज आचार्य र सत्यमोहन जोशी थारूको संयुक्त इजलासले बिहीबार सो मुद्दा पर्सामा स्थानान्तरण हुने नहुनेबारे ११ जना कानुन व्यवसायीको बहस सुनुवाइ गरेको थियो ।

अदालतमा प्रतिवादी अफताव आलमले पनि रौतहट जिल्ला अदालतले पूर्पक्षका लागि थुनामा राखेर कारबाही गर्न दिएको आदेश मेरो हकमा ठीक भएन भनी निवेदन दिएका थिए । सो निवेदन उपर पनि गत १० पुसमा रौतहट जिल्ला अदालतको थुनछेक आदेशउपर यस अदालतमा दिएको निवेदन सम्बन्धित सक्कल मिसिल साथै राखी कैफियत प्रतिवेदन गर्नु भन्ने आदेश छ ।

सो आदेशमा हालसम्म उक्त प्रतिवेदन एवं सक्कल मिसिल प्राप्त नभएकाले सो आदेशको कैफियत र सक्कल मिसिल अगामी २९ पुससम्म प्राप्त गरिसक्ने गरी कार्य गर्नु भनी आजको आदेशमा उल्लेख पनि भएको छ ।

मुद्दा सार्न खोजिएको प्रमुख कारण भने साक्षी सुरक्षालगायतमा असर पर्ने भन्दै पर्सामा मुद्दा सारी यहीँबाट स्वच्छ सुनुवाइ र न्याय सम्पादनका लागि माग भएको छ । सुनुवाइमा सम्भवतः नेपालको इतिहासमा नै कानुन व्यवसायीको बहसको पनि रेकर्ड गरी सुनुवाइ भएको छ । राजधानी दैनिकबाट