यमनमा सांसदको घरमा क्षेप्यास्त्र आक्रमण, बच्चासहित दुईको मृत्यु

१० माघ एजेन्सी । विद्रोहीहरुले यमनका एक जना सांसदको घरमा क्षेप्यास्त्र आक्रमण गरेका छन् । आक्रमणमा परी एक जना बच्चासहित दुई जनाको मृत्यु भएको स्थानीय अधिकारीहरुले बिहीबार जानकारी दिएका छन् ।

यमनको अन्तर्राष्ट्रिय मान्यता प्राप्त र साउदी अरब नेतृत्वको सैन्य गठबन्धनको सहयोग तथा समर्थन रहेको सरकार र इरानले समर्थन गरेको विद्रोहीका बीचमा यमनमा सन् २०१४ देखि द्वन्द्व हुदै आएको छ । त्यतिबेला विद्रोहीहरूले यमनको राजधानी साना आफ्नो नियन्त्रणमा समेत लिएको घोषणा गरेका थिए ।

बुधबार राति तीनै विद्रोहीहरुले सांसद मोस्साद हुसेन अल सावदीको घरलाई लक्षित गरी मारिब प्रान्तमा आक्रमण गरेको अधिकारीहरुले जनाएका छन् । राजधानीदेखि पूर्वतर्फ रहेको घरमा आक्रमणमा परी ती सांसदका बुहारी र १६ वर्षीया नातिनीको मृत्यु भएको सावा समाचार संस्थाले उल्लेख गरेको छ ।

“आक्रमणमा परी सांसद सावदी गम्भीर घाइते भएका छन्, उनीसँगै उनको परिवारका अन्य तीन जना पनि घाइते भएका छन्,” मारिबका अपराध अनुसन्धान विभागका निर्देशक हुसेन अल हुलेसीले भने ।

उनले थपे “क्षेप्यास्त्रका कारण घर पूर्ण रुपमा क्षतिग्रस्त भएको छ भने स्थानीय बासिन्दा र छिमेकीहरु त्रासपूर्ण अवस्थामा रहेका छन् ।” यमनका लागि संयुक्त राष्ट्रसङ्घका प्रतिनिधि मार्टिन ग्रिफिथ्सले घटनाको निन्दा गर्दै सैन्य सुरक्षा तत्काल बढाउन आह्वान गरे । तुलनात्मक रूपमा केही महिना अगाडिभन्दा अहिले बढी शान्ति सुरक्षाको महसुस गरिरहेका बेला यस्तो आक्रमण भएको हो ।

राष्ट्रसङ्घीय प्रतिनिधि ग्रिफिथ्सले सामाजिक सञ्जाल ट्वीटरमा लेखेका छन् “सांसदलाई र आम नागरिकलाई लक्षित गरेर यस्ता आक्रमण हुनु क्षम्य हुनसक्दैन, यो अन्तर्राष्ट्रिय कानूनहरुको उलङ्घन पनि हो ।”

गत शनिबार मारिबस्थित सैनिक शिविरमा आम नागरिकसहित ११६ जनाको मृत्यु हुनेगरी क्षेप्यास्त्र आक्रमण भएको केही दिनपछि यो घटना भएको छ । त्यस हवाई आक्रमण हुथी विद्रोहीले गरेको आरोप लगाइएको थियो ।