उपसभामुख राजपालाई

१२ माघ काठमाडौं । उपसभामुख पदका लागि सत्तासँग सति जान तयार भएका नेपाली कांग्रेसका नेतालाई नेकपाले लोप्पा ख्वाउने भएको छ ।  सत्तारुढ नेकपाले उपसभामुख सत्ता साझेदार हुन लागेको राष्ट्रिय जनता दललाई दिने निधो गरेका छन् । आज बिहान प्रधानमन्त्री केपी ओलीको सरकारी निवास बालुवाटारमा बसेका दुई अध्यक्षले उपसभामुख राजपालाई दिंदा पार्टीलाई फाइदा पुग्ने निश्कर्ष निकालेका हुन् ।

यसअघि उपसभामुख पद प्राप्तिका लागि प्रमुख प्रतिपक्षी दल नेपाली कांग्रेसका सभापति शेरबहादुर देउवा र वरिष्ठ नेता रामचन्द्र पौडेलले दुबै अध्यक्षसँग बिन्ती बिसाएका थिए । तर कम्युनिष्ट नेताहरुले कांग्रेसका नेताहरुलाई मज्जैले थाङ्नामा सुताइ दिएका छन् । नेकपाले भर्खरै सम्पन्न राष्ट्रिय सभा निर्वाचनमा राजपासँग गठबन्धन बनाएर प्रदेश २ बाट पनि दुई सिट हत्याएको थियो ।

यसअघि सत्ता साझेदार रहेको समाजवादी फोरमलाई सत्ताबाट गलहत्याएर राजपासँग हिमचिम बढाएको नेकपाले उपसभामुख दिनु स्वभाविक मानिएको छ । तर जनताको अभिमत विपरित सत्ता राजनीतिमा चुर्लुम्म डुबेका देउवाका लागि भने यो निर्णयले बिचलित बनाउन सक्छ ।