नेकपा केन्द्रीय कमिटीमा समूहगत छलफल सुरु

१६ माघ, काठमाडौं । सत्तारुढ नेपाल कम्युनिष्ट पार्टीको जारी केन्द्रीय कमिटी बैठक अन्तर्गत आजको दोस्रो बैठकमा अध्यक्षद्वयले प्रस्तुत गरेको राजनीतिक प्रतिबेदनमाथि सामुहिक छलफल सुरु भएको छ ।

साथै महासचिब विष्णु पौडेलले हिजै प्रस्तुत गरेको सांगठनिक प्रतिबेदनमा पनि छलफल गर्ने योजना अनुसार तयारी थालिएको छ । विभिन्न तीन स्थानमा छलफल गर्ने गरी १५ वटा समूह बनाइएको छ ।

एउटा समूहमा ३० जना नबढाई छलफल प्रारम्भ भएको छ । यस प्रयोजनका लागि बर्णानुक्रमलाई आधार बनाइएको बुझिएको छ । स्थान अभावले गर्दा छलफल राष्ट्रिय सभाका अतिरिक्त पार्टी कार्यालय धुम्बाराही र पेरिसडाँडालाई समेत प्रयोग गरिएको छ ।

प्रत्येक समूहमा एकजनालाई टोली नेता बनाइएको र उनले भोलिको बैठकमा आफ्नो समूहका तर्फबाट प्रस्तुत गर्ने तालिका बनाइएको छ । सचिबालय सदस्यहरुसमेत समूहगत बैठकमा सहभागी हुने गरी बैठक सञ्चालन गरिंदैछ । बैठक यही माघ २२ गतेसम्म सञ्चालन हुने कार्यक्रम रहेको छ ।