११ महिनापछि बन्यो नेविसंघको तदर्थ समिति, नेतृत्व सम्हाल्दै ढुंगाना, वैद्य र कुँवर

१६ माघ, काठमाडौं । प्रमुख प्रतिपक्षी दल नेपाली कांग्रेसका सभापति शेरबहादुर देउवाले लामो विवाद र चर्काे बहसपछि नेपाल विद्यार्थी संघको केन्द्रीय तदर्थ समितिको घोषणा गरेका छन् । सभापति देउवाले आज घोषणा गरेको तदर्थ समितिको अध्यक्षमा राजीव ढुंगाना तोकिएका छन् । साथै दुई जना महामन्त्री समेत आजै घोषणा गरिएको छ ।

१२७ सदस्यीय समितिमा देउवाले आफ्नो तर्फबाट अध्यक्ष र दुई महामन्त्रीसहतिको समिति घोषणा गरेका हुन् । तदर्थ समितिलाई आगामी ६ महिना भित्र महाधिवेशन गर्न कार्यादेश दिइएको पनि नेपाली कांग्रेस पार्टीका कार्यालय सचिव कृष्णप्रसाद पौडेलद्वारा जारी विज्ञप्तिमा उल्लेख गरिएको छ । १२ औं मधिवेशनसम्म नेवि संघ केन्द्रीय कार्यसमितिले प्रयोग गर्ने विधान बमोजिमका काम, कर्तव्य र अधिकारको प्रयोग गर्ने दिइएको छ ।

झण्डै एक वर्ष पुग्नै लाग्दा सभापति देउवाले नेविसंघको तदर्थ समिति घोषणा गरेका हुन् । २०७५ फागुन १ गते बसेको केन्द्रीय समिति बैठकको निर्णय र पार्टी विधानको धारा ४२ (१) (च) बमोजिम देउवा ११ महिना १८ दिनपछि नेविसंघ तदर्थ समिति ल्याएका हुन् ।

तदर्थ कार्यसमितिका बाँकी पदाधिकारी र सदस्यहरुको मनोनयन यथाशीघ्र गरिने विज्ञप्तिमा भनिएको छ । नेविसंघमा सभापति देउवा पक्षबाट सभापतिसहित २ महामन्त्री, २ उपाध्यक्ष, २ सहमहामन्त्री, एक जना कोषाध्यक्ष र ४० जना सदस्य रहनेछन् ।

साथै तदर्थ समितिमा पदाधिकारी रहेकाले आगामी १२ औं महाधिवेशनमा उमेदवार बन्न नपाउने पनि जारी विज्ञप्तिमा जनाइएको छ । तर ११ औँ महाधिवेशनबाट निर्वाचित नैनसिंह महर नेतृत्वको कार्य समिति विघटन भएको मिति (२०७५ माघ २९ गते) सम्म ३२ वर्ष उमेर ननाघेका विद्यार्थीहरुले नेवि संघको आगामी १२ औं महाधिवेशनमा भाग लिन पाउने भएका छन् ।