पूर्वाग्रही अख्तियार विरुद्ध आन्दोलन चर्काउने कांग्रेस निर्णय

२३ माघ, काठमाडौं । नेपाली कांग्रेसका उपसभापति विजयकुमार गच्छदार विरुद्ध अख्तियार दुरुपयोग अनुसन्धान आयोगले पूर्वाग्रही भएर मुद्धा दायर गरेको भन्दै पार्टी पदाधिकारी बैठकले सो कार्यका विरुद्ध देशव्यापी आन्दोलन चर्काउने निर्णय गरेको छ ।

पार्टी सभापति शेरबहादुर देउवा निवास बुढानिलकण्ठमा आज बिहान बसेको पदाधिकारी बैठकले यसबारे पार्टी निकट कानून व्यावसायीहरुसँग छलफल गरी पूर्वाग्रही भएको निश्कर्ष निकालेको हाे ।

यस प्रयोजनका लागि आजै अपरान्ह ३ बजे पार्टी कार्यालय सानेपामा भातृ संस्थाका पदाधिकारीलाई समेत बोलाइएको छ । आन्दोलनको तयारी गर्न भातृ संस्थालाई परिचालन गर्ने निर्णय समेत पदाधिकारी बैठकले गरेको छ ।

बैठकमा वरिष्ठ नेता रामचन्द्र पौडेल, पूर्व महामन्त्रीहरु कृष्णप्रसाद सिटौला र प्रकाशमान सिंह लगायत पदाधिकारीको उपस्थिति थियो । पदाधिकारी भेला गर्नु अघि नेताहरुले पार्टी निकट कानून व्यवसायीहरुसँग यसबारे परामर्श गरेका थिए ।