घूस्याहा बाँस्कोटालाई टोलबासीद्वारा बहिष्कार

१२ फाल्गुण, काठमाडौं । ओरालो लागेको मृगलाई बाख्राले समेत लखेट्छ भन्ने नेपाली उखान यतिखेर ७० करोडको मोलमोलाईमा जागीर खुस्किएका गोकुल बाँस्कोटाको हकमा चरितार्थ भएको छ । घूसखान मोलमोलाई गरेको अडियो टेप बाहिरिए लगत्तै राजीनामा गरी प्रधानमन्त्री केपी ओलीको बालकोटस्थित घर कुर्न फर्किएका बाँस्कोटामाथि अर्काे बज्रपात भएको हो ।

काभ्रे मूल थातथलो रहेका बाँस्कोटाले भक्तपुर लोकन्थलीमा साढे तीनतले आलिशान भवन निर्माण गरेका छन् । २०७१ सालबाट यहाँ बसोबास गर्ने बाँस्कोटाका छिमेकीको एकहुल हिजो साँझ ओली निवास बालकोट पुगी बाँस्कोटाको सातो लिएका छन् । टोल छिमेकबाट आएका अगुवाले बाँस्कोटालाई अब आफ्नो टोलमा नफकर्न चेतावनी दिएका हुन् ।

तपाईं यहाँ बस्नु भो भने हाम्रो टोल नै घूस्याँहा टोल नामाकरण हुने भएकाले बसाई सर्न चेतावनी दिइएको एकजना सहभागीले नेपालबहस डटकमलाई बताए । छरछिमेकबाट यस्तो सुझाव आएपछि बाँस्कोटा अक्क न बक्क भएका थिए ।मन्त्री हुनु अघिसम्म एक तले रहेको उनको घर अहिले साढे तीन तले बनेको छ । छरछिमेकबाट यस्तो चेतावनी आएपछि के गर्ने भन्ने विषयमा बाँस्कोटा अन्योलमा परेका छन् ।

सेक्युरिटी प्रेस खरिद प्रकरणमा बाँस्कोटाले एउटा स्वीस कम्पनीका एजेण्टसँग ७० करोड कमिसनको मोलमोलाई गरेको अडियो टेप यही फागुन ८ गते सार्वजनिक भएको थियो ।