प्रचण्डको सन्देश बोकेर माधव नेपाल पुगे बालुवाटार

१६ फाल्गुण, काठमाडौं । आज बिहान खुमलटारस्थित पुष्पकमल दाहाल ‘प्रचण्ड’ निवासमा भेला भई गत बुधबारको सचिवालय बैठक कार्यान्वयन गर्न नेकपाका शीर्ष नेताहरुको संयुक्त धारणा लिएर नेता माधवकुमार नेपाल अहिले अपरान्ह् प्रधानमन्त्री निवास बालुवाटार छिरेका छन् ।

सचिवालय बैठकले दिएको निर्देशन बमोजिम प्रधानमन्त्री केपी ओलीले रिक्त राष्ट्रियसभा सदस्यमा उपाध्यक्ष बामदेव गौतमलाई सिफारिश गर्न अस्वीकार गरेपछि राजनीतिक वातावरण तरल बनेको छ ।

प्रधानमन्त्री ओलीले गौतमलाई तत्काल राष्ट्रियसभामा नलैजाने चेतावनी दिएकाले नेताहरु भावी रणनीति बनाउन आज बिहान प्रचण्ड निवासमा भेला भएका थिए । भेलामा नेपालका अतिरिक्त वरिष्ठ नेता झलनाथ खनाल र उपाध्यक्ष वामदेव समेत उपस्थित थिए ।

बिहानको भेलाले सचिवालयको पूर्व निर्णय पालना हुनैपर्ने र त्यसका लागि एकपटक प्रधानमन्त्री ओलीलाई सचेत गराउने निर्णय भएको थियो । सोही निर्णय बमोजिम नेता नेपाल प्रधानमन्त्री ओलीलाई भेट्न अहिले बालुवाटार पुगेका हुन् । दुई नेताबीच छलफल जारी छ ।