स्वीस कम्पनीका एजेण्ट मिश्रबिरुद्ध गोकुल बाँस्कोटाले दायर गरे गालीबेईज्जती मुद्धा

१६ फाल्गुण, काठमाडौं । सेक्युरिटी प्रेस खरिद प्रकरणमा ७० करोड कमिसनको मोलमोलाई गरेको अडियो टेप सार्वजनिक भएपछि राजीनामा गरेका पूर्व सञ्चार तथा प्रविधिमन्त्री गोकुलप्रसाद बाँस्कोटाले उक्त प्रकरणमा आफ्नो मानहानी भएको दावी गर्दै आज जिल्ला अदालत काठमाडौंमा मुद्धा दायर गरेका छन् ।

बाँस्कोटाले आज ट्वीट गर्दै आफूमाथि अन्याय भएको भन्दै वारिसमार्फत अदालत गुहारेको सार्वजनिक गरेका हुन् । आफूविरुद्ध झुठ्ठा प्रचार गरी मानहानी गरेको भन्दै बाँस्कोटाल स्वीस कम्पनीका नेपाली एजेण्ट भनिने विजयप्रकाश मिश्रबिरुद्ध गाली बेइज्जती मुद्धामा न्याय माग्न अदालत गएको जानकारी दिएका हुन् ।

हिजो मात्रै प्रधानमन्त्री केपी ओलीले बाँस्कोटा निर्दोष भएकाले न्याय माग्ने तयारीमा रहेको संकेत गरिसकेका थिए ।प्रधानमन्त्रीले नै बाँस्कोटा निर्दाेष भएको अभिव्यक्ति दिएको भोलिपल्टै मुद्धा दायर भएको हो ।