बढुवा रोकिंदा प्रहरीमा चरम निराशा

२९ फाल्गुण, काठमाडौं । समायोजन विवादले नेपाल प्रहरीको डीआईजीदेखि जवानसम्मको बढुवा प्रक्रिया अवरुद्ध हँुदा चरम निराशा देखिएको छ । समयमा वृत्ति विकास नहुँदा अधिकृतहरुमा शिथिलता बढेको छ भने महत्वपूर्ण निकाय निमित्तका भरमा चलेका छन् ।

डीआईजीको बढुवा प्रक्रिया रोकिंदा कतिपय महत्वपूर्ण निकाय एसएसपीको भरमा चलाउनु पर्ने बाध्यता रहेको छ ।नवनियुक्त प्रहरी महानिरीक्षक ठाकुर ज्ञवालीलाई यो परिवेशमा काम गर्न ज्यादै अफ्ठेरो परिरहेको छ । तर तालुक मन्त्रालय गृह भने डीआईजीको दरबन्दी नै कटौती गर्ने तयारीमा रहेको छ । यो प्रकरणमा महानिरीक्षक ज्ञवाली र गृह सचिवबीच विवाद नै भएको छ ।

उता, समयमा बढुवा हुन नसक्दा कतिपय अधिकृत समय अगावै घर जानुपर्ने अवस्था सिर्जना हुन थालेको छ । त्यसैले काम गर्ने जाँगर समेत मरेर आएको छ – एक प्रहरी अधिकृत भन्छन् । गत माघ २८ गते महानिरीक्षक सर्बेन्द्र खनालसँगै २२ जना डीआईजी एकैपटक सेवानिवृत्त भएका हुन् ।  त्यसपछि धेरै ठाउँमा एसएसपीबाटै काम चलाउनु पर्ने अवस्था सिर्जना भएको छ ।

तीन रिक्त एआईजी पदमा गृह मन्त्रालयले तारणीप्रसाद लम्साल, शैलेश थापा क्षेत्री र हरिबहादुर पालको नाम सिफारिश गरेपनि मन्त्रिपरिषदले अनुमोदन गरिसकेको छैन ।