भारतीय प्रधानमन्त्री मोदीको ट्वीट : संक्रमणविरुद्ध एक भएर लड्न प्रस्ताव

३० फागुन, एजेन्सी । विश्वभर महाारीको रुप लिएको कोरोना भाइरसको संक्रमणविरुद्ध एक भएर लड्न भारतीय प्रधानमन्त्री नरेन्द्र मोदीले प्रस्ताव गरेका छन् ।

शुक्रबार सामाजिक सञ्जाल ट्वीटरमार्फत उनले दक्षिण एसियाली क्षेत्रीय सहयोग संगठन ‘सार्क’को नेतृत्वमा कोरोना भाइरसविरुद्ध लड्न बलियो रणनीति बनाएर अघि बढ्न आह्वान गरेका हुन् ।

उनले आफ्ना नागरिकलाई कोरोना भाइरसबाट जोगाउने विषयमा भिडियो कन्फरेन्समार्फत छलफल गर्न सकिने पनि बताएका छन् । मोदीले सार्क राष्ट्र सँगै कोरोना भाइरसविरुद्ध लडेर विश्वलाई नै उदाहरण देखाउन सक्ने पनि बताएका छन् ।

सार्क राष्ट्रमा नेपालसँगै भारत, पाकिस्तान, बंगलादेश, श्रीलंका, माल्दिभ्स, भुटान र अफगानिस्तान रहेका छन् । हाल नेपाल सार्कको अध्यक्ष राष्ट्र हो ।