सभापति र महामन्त्री दुबैले विधान विपरित काम गरेको सिटौलाको दावी

३ चैत्र, काठमाडौं । प्रमुख प्रतिपक्षी नेपाली कांग्रेसमा आफूलाई तेश्रो धारका रुपमा स्थापित गरेको कृष्णप्रसाद सिटौला समूह एकढिक्का रहेको सन्देश दिन आज सफल देखिएको छ । गत तह्रौं महाधिवेशनदेखि छुट्ट्रै समूह खडा गरी कांग्रेसमा उदाएको यो समूहमा हालै नेताहरु नै विभाजित भएको सन्देश प्रवाहित भएको थियो ।

त्यही सन्देश चिर्न आज राजधानीको बत्तिसपुतलीस्थित एक पार्टी प्यालेसमा आयोजित कार्यक्रम केही हदसम्म सफल भएको छ । केही समयअघि पार्टी सभापति शेरबहादुर देउवाले गठन गरेको विभाग र केन्द्रीय सदस्य मनोनयनमा सिटौला पक्षलाई समेत स्थान दिएको विषयमा नेताहरुबीच मतभेद देखिएको थियो ।

सभापति देउवाले सिटौला पक्षका शिवप्रसाद हुमागाईलाई श्रम तथा रोजगार विभाग प्रमुख बनाएका थिए भने झापाका सुधिरकुमार शिवाकोटीलाई आमन्त्रित केन्द्रीय सदस्यमा मनोनयन गरेका थिए । यी दुबैजना सिटौला निकट मानिन्छन् । तर यस सन्दर्भमा सिटौलाले आफूहरुसँग सल्लाह नगरेको भन्दै युवा नेताद्वय गगन थापा र प्रदीप पौडेलले असहमति जनाएका थिए । साथै , वरिष्ठ नेता रामचन्द्र पौडेलले समेत गगन र प्रदीप आफूसँग रहेको अभिव्यक्ति दिएका थिए ।

जसले गर्दा सिटौला पक्षमा विभाजन आएको अनुमान गरिएको थियो । त्यही सन्देशलाई चिर्न आज हामी एकतावद्ध भएर भेला भएका हौं – सिटौलाले कार्यक्रमको उद्घाटन गर्दै भने । हामी कांग्रेस सुधार अभियानमा निरन्तर लागिरहेका छौं, यात्रा अघि बढिरहेको छ, कसैले हामीमा फुट आएको सन्देश फैलाउँछ भने हाम्रो सरोकारको विषय होइन – उनले भने ।कुनै कुरालाई मात्र आधार बनाएर कसैले केही अवधारणा बनाउँछ भने त्यो उसैको चिन्ताको विषय हो हामी एक छौं, न त सभापतिसँग हाम्रो एकता छ न वरिष्ठ नेता पौडेलसँग जोडिनु परेको छ – सिटौलाले भने ।

कार्यक्रममा नेता गगन थापाले पनि सिटौलासँग मिल्दोजुल्दो अभिव्यक्ति दिए । उनले भने – सभापति र महामन्त्री दुबैले विधान विपरित काम गर्न पाइन्न । विभाग गठन गर्दा सभापतिले देखाएको व्यवहार सामन्ती रहेको आरोप उनले लगाए ।पार्टी कार्यकर्ता कसैका दास होइनन्, सबैको सम्मान गर्न नसक्नेले नेतृत्व सम्हाल्न सक्दैन, उनले भने । नयाँ सदस्यता वितरण र क्रियाशील सदस्यता नविकरण प्रक्रिया शुरु भइसकेपछि विभाग गठन र विस्तार गर्नु गलत हो उनले भने ।

यस्तै सोही कार्यक्रमलाई संवोधन गर्दै अर्का युवा नेता प्रदीप पौडेलले भने – हामी एक छौं, हाम्रो गन्तव्य उही हो । सभापतिले विधान विपरीत काम गरेको भन्दै उनले पनि कडा आलोचना गरे ।