ओलीलाई भेट्न अस्पताल पुगे प्रचण्ड

१४ चैत्र, काठमाडौं । गए राति एक्कासी मुटुको चालमा गडबडी भएर अस्पताल भर्ना भएका प्रधानमन्त्री केपी ओलीलाई भेट्न पार्टीका अर्का अध्यक्ष पुष्पकमल दाहाल प्रचण्ड अपरान्ह अस्पताल पुगेका छन् ।

बिहीबार राति ११ बजे मुटुमा समस्या देखिए लगत्तै महाराजगञ्जस्थित शिक्षण अस्पताल पु¥याइएका प्रधानमन्त्री ओलीको स्वास्थ अवस्थाबारे बुझ्न प्रचण्ड जानु भएको प्रेस सल्लाहकार विष्णु सापकोटाले बताए । करिब आधा घण्टाको भेटघाटका क्रममा दुवै नेताले ओलीको स्वास्थ्य अवस्थाका साथै कोरोना भाइरसको जोखिम कम गर्न चालिएको कदमबारे छलफल गरेका थिए ।

प्रधानमन्त्री ओलीको सबै परीक्षण भएको र सन्तोषजनक रिपोर्ट आएकाले संभवत : आज साँझ नै डिस्चार्ज गरिने अस्पतालले जनाएको छ । ओलीले गत फागुन २१ गते सोही अस्पतालमा दोस्रो पटक मृगौला प्रत्यारोपण गरेका थिए । लगत्तै राजनीतिक गतिविधिमा संलग्न ओलीले गएको आइतबार चार घण्टासम्म मन्त्रिपरिषद बैठकमा सहभागिता जनाएका थिए ।

चिकित्सकहरुको सल्लाह विपरित ओली बढी सक्रिय भएको भन्दै उनका निजी चिकित्सक डा. दिव्या सिंह शाह असन्तुष्ट थिइन् ।