कोरोनाबाट विश्वभरी ७६ हजारको मृत्यु, १३ लाख संक्रमित !

२५ चैत्र, एजेन्सी । कोभिड–१९ नाम दिइएको प्राणघातक कोरोना भाइरस सङ्क्रमणबाट विश्वभरीमा ज्यान गुमाउनेको सङ्ख्या ७६ हजार ३ सय ४३ पुगेको छ । पछिल्लो तथ्यांकअनुसार अहिलेसम्म संसारभर  १३ लाख ६२ हजार १ सय ६२ जना कोरोना भाइरसबाट सङ्क्रमित भएका छन् भने २ लाख ९३ हजार ७ सय ३३ जना उपचारपछि घर फर्किएका छन ।

कोरोनाले स्पेनमा पछिल्लो १० घण्टायता मात्रै साढे ४ सय जनाको ज्यान गएको छ । यससँगै स्पेनमा कोरोनाबाट मृत्यु हुनेको संख्या १३ हजार ७ सय ९८ पुगेको छ । १ लाख ४० हजारभन्दा धेरै संक्रमित छन । अमेरिकामा मंगलबार मात्रै ७२ जनाको मृत्यु भएको छ । ६ सय ५५ जना नयाँ बिरामी फेला परेका छन । यससँगै अमेरिकामा १० हजार ९ सय ४३ जनाको मृत्यु भएको छ । साढे ३ लाख मानिस संक्रमित छन ।

इटालीमा सबैभन्दा धेरै १६ हजार जनाको मृत्यु भएको छ । फ्रान्समा ८ हजार ९ सय ११ जनाको ज्यान गएको छ । चीनमा ३३ सय र इरानमा ३८ सय जनाको मृत्यु भएको अन्तराष्ट्रिय सञ्चारमाध्यमले जनाएका छन ।

यस्तै भारतमा १ सय ३७ जनाको ज्यान गएको छ भने पाकिस्तानमा ५५ जनाको मृत्यु भएको छ । भारतमा झण्डै ५ हजार संक्रमित हुँदा पाकिस्तानमा ४ हजार संक्रमित छन । नेपालमा भने अहिलेसम्म ९ जनामा संक्रमण पुष्टि भएको छ । यसमध्ये एक जना उपचारपछि घर फर्किसकेका छन ।