भारतमा वैशाख २१ गतेसम्म लकडाउन

२ वैशाख एजेन्सी । भारतले थप तीन हप्ता लकडाउन लम्ब्याएको छ । यसअघिदेखिको लकडाउन बुधबार सकिन लागेका बेला मंगलबार नै प्रधानमन्त्री नरेन्द्र मोदीले थप तीन हप्ता लकडाउन लम्ब्याएको बताएका हुन ।

भारतमा तिब्र गतिमा कोरोना फैलिरहेको छ । संक्रमितको संख्या १० हजार नाघेपछि जोखिम झन बढेको छ । अहिलेसम्म झण्डै ४ सय जनाको मृत्यु भइसकेको छ । यस्तो अवस्थामा लकडाउन तोडेर झन ठूलो समस्या निम्तिने भन्दै प्रधानमन्त्री मोदीले थप तीन हप्ता लकडाउन बढाउने निर्णय गरेका हुन । त्यहाँ विगत २१ दिन देखि लकडाउन जारी छ ।

देशमा जारी लकडाउन थप्ने कि नथप्ने विषयमा प्रधानमन्त्रीले देशका कोरोना प्रभावित विभिन्न राज्यका मुख्यमन्त्रीहरूसँग छलफल गर्दै आइरहेका थिए। उनलाई कोरोना प्रभावित राज्यका मुख्यमन्त्रीले लकडाउन अझै जारी राख्नुपर्ने सुझाव दिएका थिए।

सम्बोधनमा मोदीले भारतले समस्या बढ्छ भनेर नपर्खी तीब्र गतिमा फैसला गरेर भरसक रोक्ने प्रयास कोरोनालाई नियन्त्रण गर्ने प्रयास गरेको बताए। उनले आगामी एकसाता अर्थात अप्रिल २० सम्म लकडाउनलाई कडाइकासाथ लागु गरिने बताएका छन्। भारतले देशमा ५५० जनामा संक्रमण देखिएपछि २१ दिनको लकडाउन गर्ने घोषणा गरेको थियो।