कसैलाई पनि हिडेर गाउँ जान नदिन सुरक्षाकर्मीलाई प्रधानमन्त्रीको निर्देशन

५ वैशाख काठमाडौं । सर्वोच्च अदालतको आदेश र प्रमुख प्रतिपक्षी दलको माग विपरित सरकारले लकडाउनलाई थप कडाई गरेको छ । साथै कसैलाई पनि हिडेर गाउँ जान नदिने आदेश कडाईका साथ पालना गराउन सुरक्षाकर्मीलाई पनि निर्देशन दिएको छ ।

प्रधानमन्त्री केपी शर्मा ओलीले शुक्रबार मन्त्री, सुरक्षाकर्मी लगायत सम्बद्ध सबै पक्षलाई बालुवाटार बोलाएर आवतजावत पूर्ण रुपमा ठप्प पार्न निर्देशन दिएका हुन । कोरोना भाइरसविरुद्ध लकडाउन एक मात्रै विकल्प भएको र यसमाथि अलिकति पनि हेलचेक्राई नगर्न सुरक्षाकर्मीलाई प्रधानमन्त्रीले निर्देशन दिएको एक मन्त्रीले जानकारी दिए ।

शुक्रबार मात्रै सर्वोच्च अदालतले पैदलै घर हिडेकालाई निःशुल्क गन्तव्यमा पु¥याउन सरकारलाई अन्तरिम आदेश दिएको थियो । तर प्रधानमन्त्री ओलीले सर्वोच्चकै आदेश विपरित अब सडकमा हिड्न र घर जान पनि प्रतिबन्ध लगाएका छन ।

बालुवाटारस्थित प्रधानमन्त्री निवासमा आज बसेको कोरोना रोकथाम तथा नियन्त्रण उच्चस्तरीय समन्वय समिति, मन्त्रिपरिषद्का सदस्यसहितको बैठकमा प्रधानमन्त्री ओलीले सीमा नाकामा थप कडा गइर्ने र घर जान चाहने र बाटामा अलपत्र परेका नागरिकलाई प्रदेश र स्थानीय सरकारसँग समन्वय गरेर व्यवस्थापन गर्न निर्देशन दिएको बैठकपछि परराष्ट्रमन्त्री प्रदीपकुमार ज्ञवालीले जानकारी दिए ।

प्रधानमन्त्री ओलीको अध्यक्षतामा बसेको बैठकमा छिमेकी राष्ट्रहरुमा कोरोना भाइरसको सङ्क्रमण फैलिँदै गए पनि नेपालमा फैलिन नदिई नियन्त्रणमा राख्ने काम सरकारले चालेको कदम प्रभावकारी रहेको विषयमा छलफल भएको थियो । बैठकमा कोरोना रोकथाम समितिले कोरोना फैलिन नदिन प्रभावकारीरुपमा काम गरिरहेको र थप फैलिन नदिन लकडाउनलाई अझै प्रभावकारी रुपमा कार्यान्वयन गर्न प्रधानमन्त्रीले निर्देशन दिएको मन्त्री ज्ञवालीले बताए ।