प्रसिद्धि श्रेष्ठ पूर्णस्वस्थ भएर घर फर्किन

६ बैशाख, काठमाडौं । कोभिड–१९ को सङ्क्रमण देखिएका काठमाडौंकी १९ वर्षीया एक युवती उपचारपश्चात् घर फर्किएकी छन् ।

टेकुस्थित शुक्रराज ट्रपिकल तथा सरुवा रोग अस्पतालमा उपचारत रहेकी ती युवती घर फर्किएको अस्पतालका निर्देशक डा. सागरराज भण्डारीले जानकारी दिएका छन् । गत चैत ४ गते फ्रान्सबाट कतारको दोहा हुँदै क्यूआर ६५२ उडानमार्फत नेपाल आएकी प्रसिद्धि श्रेष्ठ पूर्णस्वस्थ भएर घर फर्किएकी हुन् ।

डा. राजभण्डारीका अनुसार ४८ घण्टामा दुई पटक कोभिड–१९ नेगेटिभ आएपछि उनी २७ दिनसम्म टेकु अस्पतालमा उपचार गरेर आज घर फर्किएकी हुन् । फ्रान्सबाट गत चैत ४ गते नेपाल आएकी उनलाई चैत १० गते सङ्क्रमण देखिएपछि अस्पताल भर्ना गरी आइसोलेशनमा राखेर उपचार हुँदै आएको थियो । यसअघि चीनको बुहानबाट आएका अर्का एकजनालाई पनि सङ्क्रमण देखिएपछि सोही अस्पतालमा नै उपचारपश्चात् स्वस्थ्य भएर घर फर्काइएको थियो ।

अब सो अस्पतालमा दुई पुरुषको मात्र उपचार भईरहेको छ । नेपालमा अहिलेसम्म सङ्क्रमितको सङ्ख्या ३० पुगेको छ । शुक्रबार उदयपुरमा १२ र चितवनमा दुईजनामा सङ्क्रमण देखिएको थियो ।