कोरोनाले विश्वभर रेमिटेन्स आप्रवाहमा २० प्रतिशतले गिरावट

११ बैशाख काठमाडौं । कोरोना भाइरस संक्रमणका कारण विश्वभर रेमिटेन्स आप्रवाहमा करिब २० प्रतिशतले गिरावट आउने विश्व बैंकले प्रक्षेपण गरेको छ । विश्व बैंकले बिहीबार सार्वजनिक गरेको एक अध्ययन प्रतिवेदनमा कोरोनाका कारण विश्वव्यापीरुपमा नै रेमिटेन्स आप्रवाहमा कमी आउने उल्लेख गरिएको छ ।

विश्वभर जारी लकडाउनका कारण अर्थतन्त्र संकटमा छ । कामहरु ठप्प भएका छन् । बेरोजगारी दर बढेको छ । जसका कारण रेमिटेन्स आप्रवाहमा पनि विश्वव्यापी असर पर्नेछ । रेमिटेन्सबाट बढी निर्भर रहेका मुलुकहरुलाई अझ बढी प्रभाव पार्ने विश्व बैंकको अध्ययनले देखाएको छ । अझ न्यून र मध्य आय हुने देशहरु अधिक प्रभावित हुनेछन् । लक डाउनका कारण विश्वभर नै श्रमिकको काम प्रभावित भएको छ । विश्वका करोडौं व्यक्ति यतिबेला बेरोजगार भएका छन् । जसको प्रत्यक्ष प्रभाव विश्वव्यापी रेमिटेन्समा पनि पर्नेछ ।

रोजगारी दिने मुलुक तथा कम्पनीहरु पनि कोरोनाका कारण संकटमा रहेकाले विप्रेषणमा ठूलो गिरावट आउने विश्व बैंकको ठम्याईं छ । अध्ययन अनुसार रेमिटेन्स आप्रवाहमा कमी आउँदा गरिबी बढ्ने र त्यसको सबैभन्दा बढी मार न्यून तथा मध्यम आय भएका मुलुकमा पर्नेछ । यसबाट खाद्य संकट गहिरिनेछ भने दैनिक जीवन यापन समेत थप कष्टकर हुनेछ ।

नेपालजस्ता विकासोन्मुख देशका लागि रेमिटेन्स प्रमुख आय स्रोत हो । बैंकका अनुसार दक्षिण एसियामा कोभिड–१९ का कारण २२.१ प्रतिशतले विप्रेषण आप्रवाहमा कमी आउने देखिएको छ । यस्तै, यूरोप तथा मध्य एसियामा २७.५ प्रतिशत, ल्याटिन अमेरिका र क्यारेबियन देशहरुमा १९.३ प्रतिशतले कमी आउन सक्नेछ । यस्तै, पूर्वी तथा एसिया प्रशान्त क्षेत्रमा १३ प्रतिशतले गिरावट आउन सक्ने अनुमान गरिएको छ ।

नेपालका पनि ४० लाख भन्दा बढी कामदार वैदेशिक रोजगारीमा रहेका छन् । नेपाली कामदार अधिक रहेका खाडी मुलुक, मलेसिया, दक्षिण कोरियालगायत देशमा पनि लक डाउन जारी छ । यसका कारण रेमिटेन्स आप्रवाहमा गिरावट आउने देखिएको छ । केन्द्रीय बैंकका कोरोनाका कारण नेपालमा करिब १ खर्ब रुपैयाँ रेमिटेन्स घट्न सक्नेछ । अनुसार चालु आर्थिक वर्षको ८ महिनामा ५ खर्ब ९२ अर्ब रुपैंयाँ रेमिटेन्स भित्रिएको छ ।