भारतबाट फर्केकाको आरडिटी शुरु

१२ वैशाख, बैतडी । चैत महिनामा भारतबाट फर्केका नागरिकहरुको बैतडीमा र्यापिड डाइग्नोस्टिक (आरडिटी) टेस्ट शुरु गरिएको छ । कोरोना भाइरस सङ्क्रमण रोकथाम तथा नियन्त्रण जिल्ला संयन्त्रको बैठकको निर्णयानुसार डिलाशैनी गाउँपालिका र दोगडाकेदारमा र्यापिड टेस्ट शुरु गरिएको हो ।

प्रत्येक वडाका स्वास्थ्य संस्थामा भारतबाट आएका व्यक्तिको र्यापिड डाइग्नोस्टिक टेस्ट शुरु गरिएको स्वास्थ्य कार्यालयका प्रमुख योगेशप्रसाद भट्टले जानकारी दिए । उनले भने, “कोरोना भाइरसको जोखिम न्यूनीकरणका लागि यस्तो कार्य शुरु गरिएको हो ।” अहिलेसम्म जिल्लामा ७०० भन्दा बढी नागरिकको र्यापिड डाइग्नोस्टिक टेस्ट र थ्रोट स्वाब सङ्कलन गरेर कोरोना परीक्षण गरिएको छ । अहिले उनीहरु सबैको रिपोर्ट नेगेटिभ आएको छ । चैत महिनामा जिल्लाभरि चार हजार ८२२ नागरिक भारतबाट फर्केका छन् ।

दशरथचन्द नगरपालिकामा ५३१, पुर्चौंडी नगरपालिकामा ३४३, मेलौली नगरपालिकामा ४४९, पाटन नगरपालिकामा ४८२ र सुर्नया गाउँपालिकामा ४०५ नागरिक भित्रिएका छन् । यस्तै डिलाशैनी गाउँपालिकामा २६५, दोगडाकेदार गाउाँपालिकामा ४०१, पञ्चेश्वर गाउँपालिकामा ८९५, सिगास गाउँपालिकामा १३९ र शिवनाथ गाउँपालिकामा ९१२ जना भित्रिएका बताइएको छ । गत चैत १० गतेअघि जिल्ला भित्रिएका कोही पनि क्वारेन्टाइनमा बसेका छैनन् भने उनीहरुको स्वास्थ्य परीक्षण पनि भएको थिएन्।

अन्य पालिकाहरुमा थप किट आउने बित्तिकै र्यापिड टेस्ट शुरु गरिने स्वास्थ्य कार्यालयले जनाएको छ । अहिले जिल्लामा ९०० किट मात्रै रहेको स्वास्थ्य प्रमुख भट्टले जानकारी दिएका छन् । प्रदेशमा पनि किटको अभाव रहेको र केन्द्रबाट आएपछि मात्रै अन्य पालिकाहरुमा र्यापिड टेस्ट शुरु गरिने जनाइएको छ ।

सामुदायिक वनमा अतिक्रमण

बैतडीको दशरथचन्द नगरपालिका–९ ग्वाल्लेकमा लकडाउनको मौका छोपी सामुदायिक वनमा अतिक्रमण बढेको छ । ग्वाल्लेक दर्शन सामुदायिक वनमा स्थानीयहरु हुलकाहुल जाने गरेका छन्। धेरै मानिस एकै ठाउँमा जम्मा हुन निषेध गरिएको भए पनि धेरै मानिस जम्मा भएर सामुदायिक वनमा जाने गरेको पाइएको वडाध्यक्ष हरिचन्द्र जोशीले जानकारी दिए । सामुदायिक वनमा जान प्रतिबन्ध लगाइएकाले लकडाउनको समयमा सामुदायिक वनमा नजान पनि वडा कार्यालयले आग्रह गरेको छ ।

मदिरासहित दुई जना नियन्त्रणमा

बैतडीको सिमार प्रहरी चौकीले तीन कार्टुन मदिरासहित दुई जनालाई नियन्त्रणमा लिएको छ । लकडाउनको उल्लङ्घन गर्दै गन्नादेखि सेल्तडा लगिरहेको अवस्थामा स्थानीय भगीरथ घरेडी र बल्देव भट्टलाई मदिरासहित नियन्त्रणमा लिएको सिमार प्रहरीचौकीका प्रहरी सहायक निरीक्षक दिलीपसिंह कार्कीले जानकारी दिए । दुवैजनालाई प्रहरीले नियन्त्रणमा लिएर थप अनुसन्धान गरिरहेको छ ।