थप तीन जनामा कोरोनाको पुष्टी, संक्रमित संख्या ५७ पुग्यो

१७ बैशाख काठमाडौं । सत्तारुढ नेकपा राजकीय सत्ताको किचलोमा अल्झिरहेका बेला देशमा कोरोना संक्रमण ह्वात्तै बढेको छ । आज थप तीनजनामा कोरोना भाइरस संक्रमण पुष्टि भएको छ ।

थपिएका तीनै जना प्रदेश नं. २ अन्तर्गत पर्सा र बाराका हुन् । यो सँगै अब नेपालमा कोरोना संक्रमितको संख्या ५७ पुगेको छ । टेकुस्थित राष्ट्रिय जनस्वास्थ प्रयोगशालामा गरिएको परीक्षणमा तीनै जनाको पोजेटिभ रिपोर्ट आएको हो । पुष्टि भएका तीनै जना पुरुष रहेका छन् ।

जसमा बीरगञ्ज छपकैयाका ४६ वर्षीय, बारा सिम्रोनगढका ३९ वर्षीय र बारा जितपुरका ४३ वर्षीय रहेका छन् । उनीहरु तीनै जना भारतको दिल्लीको मर्कजबाट फिरेका हुन् । उनीहरुसँगै आएका एकजनामा यसअघि नै कोरोना पुष्टि भइसकेको थियो । संक्रमित तीनै जनालाई बीरगञ्जस्थित नारायणी अञ्चल अस्पतालमा लैजाने तयारी भइरहेको छ ।