सप्तरीमा १२ सय बढीको कोरोना परीक्षण

◊ धीरुभाइ

१८ बैशाख, सप्तरी । सप्तरी जिल्लामा कोरोना भाइरस (कोभिड–१९) संक्रमणको आशंकामा आरडीटी र पीसीआर गरी हालसम्म एक हजार २३७ जनाको परीक्षण गरिएको छ । जसमध्ये ८७३ जनाको आरडीटी परीक्षण गर्दा चार जनाको रिपोर्ट पोजेटिभ आएपनि पीसीआर रिपोर्ट नेगेटिभ भएको स्वास्थ्य कार्यालय सप्तरीले जनाएको छ ।

उदयपुर भुल्के संक्रमित सप्तरीमा बसोबास गरेको बस्तिसहित अन्य गरी हालसम्म ३६४ जनाको पीसीआर परीक्षणको लागि स्वाब संकलन गरिएको छ । यसमध्ये २१९ जनाको प्राप्त रिपोर्टमा नेगेटिभ आएको स्वास्थ्य कार्यालय सप्तरीका निमित प्रमुख दुनियालाल यादवले जानकारी दिए ।

स्वास्थ्य कार्यालय सप्तरीका अनुसार गजेन्द्रनारायण सिंह अस्पतालमा १४२ जनाको आरडीटी गर्दा तीन जनामा कोरोना पोजेटिभ रिपोर्ट आएको थियो । यसैगरी स्वास्थ्य कार्यालय मार्फत ७३१ जनाको आरडीटी गरिएकोमा एक जनाको एन्टीबडी पोजेटिभ देखाएकोमा उनीहरु चारै जनाको स्वाब परीक्षणको रिपोर्ट नेगेटिभ भएको बताइएको छ ।

पीसीआर परीक्षणका लागि कूलमध्य गजेन्द्रनारायण सिंह अस्पतालमा ४७ जनाको स्वाब संकलन गरिएको थियो । उनीहरु सबैको रिपोर्ट नेगेटिभ आएको छ । भुल्के संक्रमित बसोबास गरेका बस्तिमा स्वास्थ्य कार्यालय मार्फत ३१७ जनाको स्वाब संकलन गरिएको छ । ती सबैको स्वाब परीक्षणकालागि विपी कोइराला स्वास्थ्य विज्ञान प्रतिष्ठान पठाइएकोमा बुधबारसम्म २१९ जनाको प्राप्त रिपोर्ट नेगेटिभ रहेको बताइएको छ । १४५ जनाको स्वाब रिपोर्ट आउन बाँकी रहेको स्वास्थ्य कार्यालय सप्तरीले जनाएको छ ।

उदयपुरको त्रियुगा नगरपालिका ३ भुल्केमा कोरोना संक्रमितको यात्रा बृतान्तसँग जोडिएको सप्तरीको बोदेबरसाइन नगरपालिका, कञ्चनरुप नगरपालिका, डाकनेश्वरी नगरपालिका, सुरुङ्गा नगरपालिका र बलान बिहुल गाउँपालिकाको विभिन्न बस्तिका ३१७ जनाको स्वाब संकलन गरिएको थियो । जिल्लाको विभिन्न स्थानीय तहहरुमा कुल ३० वटा क्वारेन्टाइनमा ६४९ बेड संख्या रहेको छ । ती क्वारेन्टाइनहरुमा ३७ महिला र २१९ पुरुष गरी २५६ जना भर्ना रहेका छन ।