निजी क्षेत्रलाई राहत दिने बजेट आउने : मन्त्री खतिवडा

२८ बैशाख, काठमाडौं । अर्थमन्त्री डा. युवराज खतिवडाले कोरोना महामारीले देशको अर्थतन्त्र प्रभावित भएको भन्दै आउने बजेटले अर्थव्यवस्थालाई चलायमान गर्न निजी क्षेत्रलाई फोकस गरी विभिन्न राहतका कार्यक्रम ल्याइने जानकारी दिएका छन् ।

संघीय संसद्मा आजबाट सुरु भएको आगामी वर्षको वार्षिक बजेटमाथिको छलफलमा कार्यक्रमलाई संवोधन गर्दै यस्तो बताएका हुन् । कोरोना भाइरसबाट आक्रान्त विश्व अर्थतन्त्रलाई चलायमान गर्नु ठूलो चुनौती भएको स्पष्ट गर्दै अर्थमन्त्री डा. खतिवडाले उच्च चपेटामा परेको निजी क्षेत्रको समस्यालाई ध्यान दिइने उद्घोष गरे ।

निजी क्षेत्रलाई राहत दिन आगामी बजेटमा विशेष व्यवस्था गरिने जानकारी दिंदै उनले भने– अब करको दर हैन दायरा बढाउने नीति लिइने छ । यस्तै निजी क्षेत्रलाई राहत दिन विभिन्न राहतका प्याकेज ल्याइने पनि बताए । देशको अर्थतन्त्रको आधार स्तम्भ भनेकै निजी क्षेत्र भएकाले त्यसको उत्थान गर्न सरकार कटिवद्ध छ– अर्थमन्त्री डा. खतिवडाले भने । साथै अब आन्तरिक र वाह्य लगानी बढाउने नीति अख्तियार गरिने सरकारी योजनाबारे खुलस्त गर्दै उनले नयाँ बजेटले लगानीमैत्री कार्यक्रमलाई प्राथमिकतामा राख्ने उल्लेख गरे ।