कालीमाटी तरकारी बजारमा कोरोना सं‌क्रमणको परीक्षण गर्न स्वाब संकलन

१ जेठ, काठमाडौं । काठमाडौं उपत्यकाको कालीमाटी फलफूल तथा तरकारी बजारमा बिहीबार कोरोना संक्रमणको परीक्षण गरिएको छ । स्वास्थ्य तथा जनसंख्या मन्त्रालयको आयोजनामा कालीमाटी तरकारी बजारभित्र तरकारी बिक्री गर्ने, ढुवानीलगायतका काममा संलग्नको परीक्षण गरिएको हो ।

आज बिहान ११ बजेदेखि सुरु भएको स्वाव संकलन अपरान्ह ५ बजेसम्म जारी रहने छ। उपत्यकामा कोरोना संक्रमित भेटिएपछि स्वास्थ्य मन्त्रालयले परिक्षणलाई तीव्रता दिइहरको छ भने सर्वसाधरणले पनि उत्सुकता पूर्वक कोरोना परिक्षण गराइ रहेका छन्।

बजार क्षेत्रभित्र प्रत्यक्ष रुपमा कृषि वस्तुको खरिद बिक्रीमा संलग्न हुने व्यवसायी, व्यवसायीका सहयोगी, ढुवानीमा संलग्न हुने चालक, सहचालक, भरिया, सरसफाइ मजदुर, सुरक्षाकर्मी र कर्मचारीको परीक्षण गरिएको छ ।

यहाँ ४ सय जनाको र्‍यापिड डाइग्नोस्टिक टेस्ट ‘आरडीटी’ प्रविधिबाट परीक्षण गरिएको छ । त्‍यस्तै, दुई सय जनाको पीसीआर प्रविधिबाट कोरोना सं‌क्रमण परीक्षण गर्न स्वाब संकलन गरिएको छ। बिहीबार परीक्षण नसकिए शुक्रबार पनि नमुना लिइने कालीमाटी फलफूल तथा तरकारी बजार विकास समितिले जनाएको छ ।

इपिडिमियोलोजी तथा रोग नियन्त्रण महाशाखाका निर्देशक डा. बासुदेव पाण्डेले जोखिममा परेका समूह निर्धारण गरी पहिलो चरणमा १० हजारको नमुना परीक्षण गरिने बताए । पहिले विभिन्न अस्पतालमा कार्यरत चिकित्सक, सुरक्षाकर्मी, तरकारी व्यापारी र सञ्चारकर्मीहरुको परीक्षण गरिने उनले बताए । बिहीबार कालीमाटी बजारसँगै टिचिङ अस्पतालमा कार्यरत चिकित्सकको पनि नमुना संकलन गरिएको छ ।